देश
काठमाडौं । प्रहरी प्रधान कार्यालय सञ्चार निर्देशनालयमा एकसातादेखि चलेको नयाँ सञ्चार प्रविधि तथा सूचना सुरक्षा सम्बन्धि प्रशिक्षण कार्यक्रम सम्पन्न भएको छ ।
दुई भागमा विभाजन गरिएको कार्यक्रमको पहिलो दुई दिन फेडरेसन अफ कम्प्युटर एशोसियसन नेपाल र इन्टरनेट सोसाइटी नेपाल च्याप्टरको सहयोगमा प्रहरी प्रधान कार्यालय सञ्चार निर्देशनालय र केन्द्रीय अनुसन्धान व्यूरोको सहकार्यमा सञ्चालन गरिएको हो । दोस्रो दुई दिनको प्रशिक्षण कार्यक्रम सञ्चार निर्देशनालयको आयोजनामा सोसाइटी अफ इलेक्ट्रोनिक्स एण्ड कम्युनिकेसन इन्जिनियर्स र फेडरेसन अफ कम्प्युटर एशोसियसन नेपालको सहयोगमा सम्पन्न भएको थियो ।
विशेष गरी प्रविधिको बढ्दो प्रयोगको विद्यमान समयमा सञ्चार नेटवर्क तथा सूचना व्यवस्थापनमा आउन सक्ने संभावित जोखिमहरुको पहिचान, मूल्याङ्कन र निराकरण गर्ने सम्बन्धमा प्रशिक्षण गरिएको थियो । यसका साथै विद्युतिय अपराध तथा हाल नेपालमा यसको अवस्था लगायत प्रचलित ऐन, कानुनका सम्बन्धमा सम्बन्धित क्षेत्रका विज्ञहरुबाट प्रशिक्षण प्रदान गरिएको थियो ।
कार्यक्रम समापनको अवसरमा सञ्चार निर्देशनालयका प्रमुख प्रहरी नायब महानिरीक्षक डा.राजिव सुब्बाले प्रविधिमय वर्तमान समयमा प्रविधिको सही तथा सुरक्षित प्रयोगको लागि यस्ता कार्यक्रम प्रभावकारी हुने बताए । उनले भविष्यमा पनि यस्ता कार्यक्रम संचालनको लागि विभिन्न संघ संस्थासँग सहकार्य गर्न सकिने बताउँदै कार्यक्रममा सिकेका कुरा व्यवहारमा उतार्न प्रशिक्षार्थीहरुलाई निर्देशन दिए । उक्त प्रशिक्षणमा ४८ जना प्रहरी अधिकृतको सहभागिता थियो ।
प्रकाशित मिति: बुधबार, असार २९, २०७३ १९:४१
प्रतिक्रिया दिनुहोस्