चितवन । कम्युनिष्ट गठबन्धन बनेपछि पहिलोपटक चितवन आएका नेकपा (माओवादी केन्द्र) का अध्यक्ष पुष्पकमल दाहाल प्रचण्डले कम्युनिष्ट गठबन्धनलाई वर्तमान समयको विशेषताको रुपमा अथ्र्याएका छन् ।
वैशाखमा स्थानीय तहको निर्वाचनका बेला चुनावी कार्यक्रममा कांग्रेस सभापति शेरबहादुर देउवासँग एउटै मञ्चमा उभिएर प्रचण्डले कांग्रेस र माओवादी केन्द्रको गठबन्धन नयाँ राजनीतिक प्रयोग र कठोर गठबन्धन भनेका थिए । त्यही बेला प्रचण्डले नयाँ युगको शुरुआत भनेर छोरी रेणु दाहाल जिताउन कांग्रेस कार्यकर्तालाई रिझाउने प्रयास समेत गरेका थिए ।
कांग्रेस सभापति देउवाले पनि संघीय निर्वाचनसम्मै सहकार्य अघि बढ्ने बताएका थिए । त्यो बेला प्रचण्ड प्रधानमन्त्री थिए । अहिले देउवा प्रधानमन्त्री छन् । तर यी दुई नेता दुई ध्रुबमा बाँडिन ६ महिना लागेन । एकाएक गठबन्धन तोडेर अर्को गठबन्धनमा पुगे प्रचण्ड ।
त्यसपछिको आज चितवनमा पहिलो पत्रकारसँगको भेटघाटमा उनले वैचारिक हिसावले पनि एकता आवश्यक भएको जिकिर गर्दै त्यही सहमतिका साथ गठबन्धन तयार भएको दावी गरे ।
प्रचण्डले चितवन क्षेत्र नम्बर ३ बाट उमेदवारी दिने पक्काजस्तै भएको छ ।
उमेदवारको मनोनयन दर्ता शुरु हुन तीनदिन मात्रै बाँकी रहँदा समेत टुंगो लगाउन गठबन्धन सफल भएको छैन । चितवनमा आज पत्रकारसँगको भेटघाटनमा उनले उमेदवारका विषयमा खासै समस्या नरहेको दाबी गरे पनि एमाले र माओवादी नेताको आ–आफ्नै दावीका कारण समस्या परेको संकेत गरे ।
चितवनको क्षेत्र नम्बर २ मा एमालेले सर्वसम्मत रुपमा हालका सांसद कृष्णभक्त पोखरेललाई सिफारिस गरेको थियो ।
सोही क्षेत्रमा संविधानसभामा जितेका माओवादी नेता रामबहादुर थापा बादल पनि उठ्ने अडान यथावत छ । त्यही विवादले धेरै उमेदवार छनोट रोकिएको हो । प्रचण्डले ८,१० स्थानमा उम्मेदवार चयन गर्न बाँकी रहेको जनाए ।
चितवनको भरतपुरमा प्रेस सेन्टर र प्रेस चौतारी नेपालको संयुक्त पत्रकार सम्मेलनमा दाहाल सहभागि थिए । त्यसअघि एमाले र माओवादीका जिल्लादेखि केन्द्रसम्मका नेताहरुले भरतपुर विमानस्थलमा आएर प्रचण्डको भव्य स्वागत गरेका थिए ।
त्यसपछि पत्रकारसँग अध्यक्ष प्रचण्डले नेपालका ८,१० स्थानमा उमेदवारको टुंगो लाग्न बाँकी भएको भन्दै बेलुकासम्ममा टुंगो लाग्ने बताए । “छलफल चलिरहेको छ, जटिल भएर पनि हैन, समय असाध्यै चाप भएर हो, सम्भवतः आज बेलुका मेरो र नेकपा एमाले अध्यक्ष केपी ओलीको बैठक छ, त्यो बैठकबाट टुंगो लाग्छ,” उनले भने ।
मतपत्रको विषयमा केही आशंका भए पनि अहिले टुंगिसकेको भन्दै उनले आशंका लिनुपर्ने आवश्यकता नरहेको समेत दावी गरे । पश्चिम चितवनको एउटा स्कुलको कार्यक्रममा सहभागी हुन प्रचण्ड चितवन आएका हुन् ।
विगतमा कांग्रेससँगको गठबन्धन तोडिएको विषयमा प्रष्टसँग प्रचण्डले केही भनेनन् । आरोप प्रत्यारोपमा संयमित देखिएका प्रचण्डले हरेक पार्टीले आ–आफ्नै हितलाई प्राथमिकता दिएर तालमेल गर्ने गरेको समेत बताए ।
उनले अहिलेको गठबन्धन भने फरक किसिमको रहेको बताए । “अहिलेको नयाँ कुरा भन्या के हो भने बाम एकता र गठबन्धन गर्ने जो प्रयास गरिएको छ, यो अली बढी बैचारिक र राजनीतिक पक्ष अवश्य छ,” उनले भने ।
संवाद र सहकार्यको हिसाबले अहिले पनि सरकारमा रहेको र कांग्रेससँग सहकार्य तोडिई नसकेको कुरा बताउँदै कांग्रेसलाई पनि थुमथुम्याउने प्रयार गरे ।
ठुला थोरै पार्टी रहने प्रक्रियाको शुरुआत माओवादी र एमालेले गरेको भन्दै प्रचण्डले भने, “काँग्रेसमा पनि त्यो शुरुआत भएको छ,यो राष्ट्रको हितमा हुन्छ यो जनताको हितमा हुन्छ भनेर बुझ्नु उचित छ ।”
चितवनका जनताको विश्वास लिएर देशको नेतृत्व गर्ने तयारीमा रहेको उनले बताए । २०६२ सालमा ३८ जनाको ज्यान जाने गरी भएको बाँदरमुढे घटनाको विषयमा सोधिएको प्रश्नमा प्रचण्डले घटना भएको भोलीपल्टै माफी समेत मागिसकेको र बाँदरमुढे घटना पीडितहरुलाई यसअघि पनि सम्बोधन गरेको जिकिर गरे ।