काठमाडौं । राष्ट्रिय प्रजातन्त्र पार्टी राप्रपाले स्पष्टीकरण सोधेका तीन नेताले कार्यसम्पादन समिति बैठकको निर्णयमा ध्यानाकर्षण भएको जनाएका छन् । बिहीबार तीन नेताले संयुक्त विज्ञप्ति जारी गर्दै २४ घण्टे स्पष्टीकरण सोधेको कुरा सामाजिक संजालमार्फत थाहा पाएको उल्लखे गरेका छन् ।
 
पार्टीको हित विपरीतका गतिविधि जारी राख्ने, अनधिकृत वार्ता समिति बनाउने र सञ्चारमाध्यममा जथाभावी समाचार प्रकाशन, प्रशारण गर्ने, गराउने कार्यमा संलग्न भएको भन्दै राप्रपाले नेताहरू दिलनाथ गिरी, दिलविकास राजभण्डारी, श्यामप्रसाद तिमल्सिना र राजाराम श्रेष्ठसँग स्पष्टीकरण माग गर्ने निर्णय गरेको थियो । तर, राजाराजम श्रेष्ठ बाहेकका नेताहरूले बिहीबार विज्ञप्ति जारी गर्दै पार्टी हित विपरित काम भयो भन्दै स्ष्पटीकरण सोधिनु आपत्तिजनक भएको उल्लेख गरेका छन् ।
 
“अनुशासनहिनताको जलप लगायर पूर्वाग्रही ढंगले असहिष्णु भई डण्डा चलाउने दुष्प्रयास गरिएको छ, यो खेदजनक छ, आपत्तिजनक छ, अस्वीकार्य छ,” विज्ञप्तिमा लेखिएको छ, “हामी नेतृत्व बर्गमा प्रश्न गर्न चाहन्छौं – के राप्रपा भित्र आन्तरिक प्रजातान्त्रिक अभ्यास बर्जित छ ? पार्टी भित्र न्युनतम प्रजातन्त्रको अवसान भैसकेको हो ? कि नेतृत्वको चरित्र र व्यवहार निषेधको राजनीतिबाट अभिप्रेरित हो ? हामिले पार्टीलाई फराकिलो बनाउनु पर्छ, ठूलो बनाउनु पर्छ । पार्टीभन्दा बाहिर रहेकालाई समेट्नु पर्छभन्दा पार्टीको अहित भयो ? पार्टी हित अनुसार अभिव्यक्ति स्वतन्त्रता पनि नरहने भयो अब ?”

उनीहरुले  थप प्रश्न गर्दै लेखेका छन्, “पार्टी बनाउने र बचाउने कुरा कसरी पार्टी हित विपरीत हुन्छ ?, चाकरी, चाप्लुसी, ज्युहजुरी र भक्तिगान मात्र स्वीकार्य हो ? बहस, छलफल, चिन्तन, आलोचनालाई पार्टीभित्र स्थान नभएकै हो ? यी गम्भीर प्रश्नको हामी जवाफ चाहन्छौँ ।”

तीन नेताले २४ घण्टे स्पष्टीकरण निषेध, पूर्वाग्रह र दुराशयबाट भएको भन्दै पार्टी नेतृत्व अप्रजातान्त्रिक, नेतृत्व सर्वसत्तावादी छ भन्ने स्पष्ट कुरा स्पष्टीकरण सोधाइबाट बुझ्न सकिने उल्लेख छ ।