लन्डन । चीनबाट देखिएको खतराबारे चेतावनी दिन बेलायत र अमेरिकाका सुरक्षा सेवाका प्रमुखद्वय अप्रत्यासित रूपमा एकैसाथ सार्वजनिक भएका छन् । 

अमेरिकाको संघीय जाँचबुझ ब्यूरो (एफबीआई)का निर्देशक क्रिस्टोफर रेले भनेका छन्, “चीन हाम्रो आर्थिक र राष्ट्रिय सुरक्षाका लागि सबैभन्दा ठूलो दीर्घकालीन खतरा रहेको थियो र यस मुलुकले पछिल्ला चुनावहरू लगायत राजनीतिमा पनि हस्तक्षेप गरेको थियो ।”

बेलायतको गुप्तचर निकाय एमआई ५ का प्रमुख केन म्याकलमले भनेका छन्, “विगत तीन वर्षदेखि मेरो सेवाले चीनको गतिविधि विरुद्धको आफ्नो काम दोब्बर भन्दा बढी गरेको छ । र, हामीले यस कार्यलाई पुनः दोब्बर बनाउँदैछौँ ।”

उनले सन् २०१८ को तुलनामा एमआई ५ ले अहिले चिनियाँ कम्युनिस्ट पार्टीका गतिविधिहरूमाथि सात गुणा बढी अनुसन्धान गरिरहेको बताएका छन् ।

एफबीआईका रेले चेतावनी दिँदै भनेका छन्, “यदि चीनले बल प्रयोग गरेर ताइवान कब्जा गर्न खोजेको खण्डमा यसले विश्वले अहिलेसम्म देखेकोमध्ये सबैभन्दा भयावह मामिला अवरोधहरूमध्ये एकको प्रतिनिधित्व गर्नेछ ।”

यसबारे प्रतिक्रिया व्यक्त गर्दै चिनियाँ विदेश मन्त्रालयका प्रवक्ता झाओ लिजियानले बताएका छन्, “बेलायती गुप्तचर निकायले ‘चिनियाँ खतरा सिद्धान्त’को प्रपोगान्डा गर्ने प्रयास गरिरहेको छ । र, म एमआई ५ का अध्यक्षलाई ‘काल्पनिक दानवहरू’लाई भुल्न सल्लाह दिन्छु ।”

झाओले एफबीआईका निर्देशकले पनि चीनमाथि आक्रमण गर्ने बहानाको रूपमा चीनको खतरालाई प्रयोग गरिरहेको र यो शीतयुद्धकालीन मानसिकता भएको बताएका छन् । साथै, उनले निर्देशकलाई गैरजिम्मेवारपूर्ण टिप्पणीहरू नर्गन पनि आह्वान गरेका छन् । 

बेलायतको राजधानी लन्डनको थेम्स हाउसस्थित एमआई ५ को प्रधान कार्यालयमा पहिलो पटक यी दुई सुरक्षा प्रमुख एकै साथ सार्वजनिक भएका हुन् । 

बीबीसीबाट ।