काठमाडौं । नेकपा एमालेले अर्थमन्त्री जनार्दन शर्माले मन्त्रीको रुपमा बोल्ने नैतिक अधिकार नभएको बताएको छ । एमाले सांसद योगेश भट्टराईले छानबिन समिति गठन भएपछि अर्थमन्त्रीले नैतिक अधिकार गुमाएको बताए ।
 
उनले आज गठन भएको छानबिन समितिको स्वागत गर्दै भने, “अर्थमन्त्रीलाई बोलाउँदै हुनुहुन्छ । हाम्रो यसमा गम्भीर विमति छ । अर्थमन्त्रीको हिसाबले बोल्ने नैतिक अधिकार छैन । संसदीय समितिले दोष छ कि छैन भनेर हेर्ने होइन । के कारबाही गर्ने हो भन्ने हेर्ने हो ।”
 
भट्टराईले अर्थमन्त्री शर्मा कारबाहीको भागिदार हुनुपर्ने बताए । अर्थमन्त्रीले राजीनामा दिए वा प्रधानमन्त्री शेरबहादुर देउवाले बर्खास्त गरे मात्रै उनको भाषण सुन्न एमाले तयार हुने उनले बताए ।
 
“हामी चाहन्छौं, राजीनामा दिनुस् । त्यसपछि हामी भाषण सुन्न तयार छौं । प्रधामन्त्रीले बर्खास्त गर्नुस् । त्यसपछि भाषण सुन्न तयार छौं,” भट्टराईले भने ।