काठमाडौं । अर्थसचिव मधुकुमार मरासिनी अनिश्चित कालका लागि बिदामा बसेका छन् । बजेट निर्माणलगायतमा अर्थमन्त्री जनार्दन शर्मा विवादमा परेपछि अर्थसचिव मरासिनी बिदामा बसेका हुन् । स्रोतका अनुसार उनले आज बिहान प्रधानमन्त्री शेरबहादुर देउवा र मुख्यसचिव शंकरदास वैरागीलाई भेटेर बिदा बस्ने जानकारी गराएका थिए ।

मन्त्रालयका एक अधिकारीले भने, “हिजो साँझ भेटेका हौं । तर, आज सञ्चो नभएर नआउने भन्ने सूचना पाएका छौं । अरु कुरा थाहाँ भएन ।”

अर्थमन्त्री शर्मामाथि बजेट घोषणाअघि अनधिकृत व्यक्तिलाई प्रवेश गराएर करका दर हेरफेर गरेको आरोप छ ।

सोही प्रकरणमा अर्थ मन्त्रालयको सीसीटीभी फुटेज ‘डिलिट’ गराइएको आरोपसमेत अर्थमन्त्रीमाथि छ । सत्तारुढ दलका नेता र प्रमुख प्रतिपक्षी दल नेकपा एमालेले अर्थमन्त्री शर्माको राजीनामा मागिरहेका छन् ।