नयाँ दिल्ली । हिन्दूकी देवी कालीको पहिरनमा रहेकी एक महिलाले चुरोट पिइरहेको देखाइएको फिल्मको एउटा पोस्टरले भारतमा जनआक्रोश फैलाएको छ । निर्देशक लिना मणिमेकलाइले शनिबार आफ्नो नयाँ चलचित्र ‘काली’को यस्तो विवादास्पद पोस्टर ट्विट गरेकी थिइन् । 

उनले यसलाई ‘प्रदर्शन वृत्तचित्र’को संज्ञा दिएकी थिइन् । पोस्टर सार्वजनिक गरिएयता आक्रोशित हिन्दूहरूबाट सयौँ प्रतिक्रिया व्यक्त भइसकेका छन् । 

हिन्दूहरूले निर्देशक लिनाले आफूहरूको धार्मिक आस्थामा चोट पु¥याएको आरोप लगाएका छन् । संहारकी हिन्दू देवी कालीको करोडौँ मानिसले पूजाअर्चना गर्ने गरेका छन् । अधिकांश मानिसले लिनाको गिरफ्तारीका लागि आवाज उठाइरहेका बेला सोमबार उनको नाम भारतको सामाजिक सञ्जालमा ट्रेन्ड भएको छ । 

हाल क्यानडामा अध्ययन गरिरहेकी उनले बीबीसीलाई भनेकी छन्, “मैले चलचित्रमा देखाएको देवीले ‘मानवताको रक्षा र विविधतालाई अंकमाल गर्दछ’ । एक कवियत्री र चलचित्र निर्मात्रीको हिसाबले मैले कालीलाई आफ्नो स्वतन्त्र परिकल्पनामार्फत प्रस्तुत गरेकी छु ।”

भारतमा स्क्रिनमा धार्मिक स्वरूपहरू प्रस्तुत गर्नु एउटा संवेदनशील विषय हो । सन् २०१५ मा भारतको सेन्सर बोर्डले बलिवुड चलचित्र ‘एंग्री इन्डियन गडेस’का थुप्रै दृश्य काट्न माग गरेको थियो । सो चलचित्रमा थुप्रै देवीका तस्बिरहरू देखाइएको थियो । अन्य थुप्रै चलचित्र निर्माता र कलाकारहरूले पनि आफ्ना चलचित्रमा धार्मिक विषयवस्तु वा सन्दर्भहरू चित्रण गरेका कारण विरोधको सामना गर्नु परेको छ । 

भारतमा अहिले एकजना राजनीतिज्ञले मुस्लिम समुदायको आस्था पैगम्बर मोहमदबारे आपत्तिजनक अभिव्यक्ति दिएका कारण मुस्लिमहरूबाट विरोध प्रदर्शन भइरहेका छन् ।

बीबीसीबाट ।