धनगढी । बझाङको सुर्मा गाउँपालिका–२, रातोपडमा ट्याक्टर दुर्घटना हुँदा एकजनाको मृत्यु भएको छ । ६ जना सामान्य घाइते भएका छन् ।

ट्याक्टरमा सवार स्थानीय २७ वर्षीय नरेश बोहराको मृत्यु भएको हो । दुर्घटनामा गम्भीर घाइते भएका उनको उपचारका क्रममा जिल्ला अस्पताल बझाङमा मृत्यु भएको जनाइएको छ ।

चालक विमल बोहरासहित ६ जना घाइते भएका र उनीहरू जिल्ला अस्पतालमा सामान्य उपचारपछि डिस्चार्ज भइसकेका जिल्ला प्रहरी कार्यालय बझाङले जनाएको छ ।

गए राति करिब ९ बजे सुदूरपश्चिम प्रदेश ०२–००१ त १३०८ नम्बरको ट्याक्टर अनियन्त्रित भई सडकबाट अन्दाजी २० मिटर तल खसेको प्रहरीले जनाएको छ । ट्याक्टर चालकलाई जिल्ला प्रहरी कार्यालय बझाङले नियन्त्रणमा लिएको छ ।