काठमाडौं । कानुन, न्याय तथा संसदीय मामिलामन्त्री गोविन्द्रप्रसाद शर्मा कोइरालाले संसद्को चालु अधिवेशनबाट नागरिकतासम्बन्धी विधेयक पारित हुने बताएका छन् ।

प्रमुख प्रतिपक्ष दल नेकपा (एमाले) समेत सो विधेयक पारित गर्न सकारात्मक रहेको उल्लेख गर्दै उनले चालु अधिवेशनबाटै पारित हुने जिकिर गरे ।

६४औँ संसद् दिवसका अवसरमा बिहीबार काठमाडौंमा आयोजित एक कार्यक्रममा उनले नागरिकतासम्बन्धी विधेयकमा धेरै विवादहरू रहेकाले त्यसलाई विवादरहित बनाउन सरकारले गृहकार्य गरिरहेको बताए ।

संसद्को राज्य व्यवस्था तथा सुशासन समितिमा समेत सो विधेयकमा देखिएका विवाद निरूपण नभएको भन्दै मन्त्री कोइरालाले सहमति जुटाएर अघि बढ्न सरकार लागिपरेको उल्लेख गरे ।

मन्त्री कोइरालाले संसद्लाई प्रभावकारी बनाउन सांसदहरूले योगदान दिन नसकेको भन्दै असन्तुष्टि समेत व्यक्त गरे । कतिपय सांसदको उपस्थिति नै नहुँदा संसद्ले गर्नुपर्ने कानुन निर्माणको काममा ढिलाइ भएको उनको भनाइ थियो ।