काठमाडाैं । राप्रपा नेपालका अध्यक्ष कमल थापाले आमूल परिवर्तनको नारा लिएर जनतालाई मालिक बनाउने, आर्थिक विकास र समृद्धि हासिल गर्ने उद्देश्य लिएर सुरु भएको यात्रा १६ वर्ष पछाडि ठिक विपरीत गन्तव्यमा पुगेको बताएका छन् ।

उनले जनता बलियो र प्रजातन्त्र सुदृढ हुनुको सट्टा केही सीमित राजनैतिक दलका सीमित नेताहरूले राज्यसत्ता कब्जा गरेर सर्वसत्तावाद लाद्ने काम भएको आराेप लगाएका छन् ।

आज (साेमबार) काठमाडाैंमा आयोजित प्रदेश स्तरीय स्वयंसेवक प्रशिक्षण कार्यक्रमलाई सम्बोधन गर्दै अध्यक्ष थापाले राष्ट्रियता अत्यन्त कमजोर हुँदै गइरहेको, विदेशीहरूको चलखेल र प्रभाव तीव्र रूपले बढेको भन्दै बाह्य शक्तिहरूको रणनीतिक प्रतिस्पर्धा स्थल बन्न सक्ने खतरा भएको बताए ।

कार्यक्रममा अध्यक्ष थापाले आगामी निर्वाचनमा राष्ट्रिय पार्टी बनाउन आवश्यक मेहनत गर्न, संवाद गर्न संकोच नमान्न र हिन भावनाबाट मुक्त भई अगाडि बढ्न बागमती प्रदेशका नेता कार्यकताहरूलाई निर्देशन दिए । 

कार्यक्रममा बागमती प्रदेशका अध्यक्ष माधव खत्रीले सिकेका, बुझेका कुराहरूलाई जनता समक्ष पुर्‍याउन आफूहरू सबै जुट्नुपर्ने बताए ।

प्रशिक्षण विभागका प्रमुख एवं महामन्त्री सुशील कुमार श्रेष्ठले आगामी निर्वाचनलाई दृष्टिगत गरी पाँच सय स्वयंसेवक पालिकाहरूमा खटाइने बताए ।

प्रशिक्षणमा बागमती प्रदेशका १७५ जनाको सहभागिता रहेको थियो ।