जनकपुरधाम । मधेस प्रदेश सरकारको बजेट सार्वजनिक भएको एक साता बितिसक्दासमेत बजेटमाथिको छलफल सुरु भएको छैन । रेडबुक छपाइमा ढिलाइ हुँदा छलफल सुरु हन नसकेको हो ।
बजेट भाषणको पूर्व तयारी गर्नुपर्ने बजेटको सम्पूर्ण विवरण समेटिएको पुस्तक तयार हुनुपर्नेमा सरकारको लापरबाहीले त्यसो भएको देखिँदैन । असार १ गते प्रदेश सभामा अर्थमन्त्री शैलेन्द्र साहले बजेट वाचन गरेका थिए ।
सम्पूर्ण बजेट विवरण समेटिएको रेडबुक छलफलका लागि सांसदहरूलाई उपलब्ध गराउनुपर्ने प्रावधान छ । सांसदहरूले रेडबुक प्राप्त गरेपछि मात्र मन्त्रालयगत रूपमा बजेटमाथिको दफावार छलफल प्रारम्भ हुन । तर, सरकारले हरेक वर्ष बजेट सार्वजनिक गरेको हप्ता दिनपछि मात्र रेडबुक उपलब्ध गराउने गरेको लोकतान्त्रिक समाजवादी पार्टी (लोसपा)का सांसद परमेश्वर साह बताउँछन् ।
"बजेटमाथिको छलफलका लागि सदनमा पर्याप्त समय दिनुपर्छ," उनले भने, "हिउँदे सदनलाई बजेट अधिवेशन पनि भन्ने गरिएको छ । तर प्रदेश सरकारले व्यवस्थित र लोकतान्त्रिक विधि अनुरूप सदनलाई चलाएको छैन ।"
अर्थ मन्त्रालयले बजेट पुस्तिका उपलब्ध नगराएको कारण सदन सञ्चालन हुन नसकेको प्रदेश सभाका सचिव रञ्जित यादवले जनाए । "सरकारले रेडबुक उपलब्ध गराएपछि सदन सञ्चालन हुने छ," उनले भने, "यसै हप्ता रेडबुक आउने छ ।"
यस सम्बन्धमा मन्त्रालयका अधिकारीहरूले काम भइरहेको बताउँदै चाँडै रेडबुक सांसदहरूलाई उपलब्ध गराइने बताएका छन् ।
सबै मन्त्रालयका योजना, बजेट लगायतका सम्पूर्ण विवरणहरू उल्लेख गर्नुपर्ने भएकाले केही समय लागेको उनीहरूको तर्क छ ।
आगामी वर्षका लागि प्रदेश सरकारले ४६ अर्ब ८८ करोड ९ लाख ४६ हजारको बजेट सार्वजनिक गरेको छ । अर्थ मन्त्रालयले कानुन, न्याय तथा प्रदेश सभा मामिलालाई सबै भन्दा कम र भौतिक पूर्वाधार विकास मन्त्रालयलाई सबै भन्दा बढी बजेट विनियोजन गरेको छ ।