काठमाडौं । प्रमुख प्रतिपक्ष दल नेकपा (एमाले)का सांसद भैरवसुन्दर श्रेष्ठले अर्थमन्त्री जनार्दन शर्मा कारागारमा बस्न लायक रहेको टिप्पणी गरेका छन् । बजेट निर्माणमा अनधिकृत व्यक्तिलाई सहभागी गराएर जघन्य अपराध गरेका अर्थमन्त्री शर्मा अरू देशमा भए कारागारमा बस्न लायक हुने उनको भनाइ थियो ।

आइतबार राष्ट्रियसभा बैठकमा विशेष समय लिएर बोल्दै सांसद श्रेष्ठले ‘यहाँ त सो घटनाबारे सत्यतथ्य बाहिर ल्याउन संसदीय समिति गठन गर्न आफ्नो पार्टीले गरेको मागलाई समेत सरकारले बेवास्ता गरेको’ भन्दै आपत्ति जनाए । बरु, उल्टै सरकारले मन्त्री शर्माले अनधिकृत व्यक्तिलाई सहभागी गराएर ल्याएको बजेट हतारमा संसद्बाट पारित गराएको गुनासो उनले ।

सांसद श्रेष्ठले बजेटमा करको दर तय गर्ने काममा अर्थमन्त्री शर्माले अनधिकृत व्यक्तिलाई सहभागी गराएर देशकै लागि जघन्य अपराध गरेको आरोप लगाए । “आज अर्थमन्त्रीले यति ठूलो जघन्य अपराध गर्नुभएको छ, प्रतिनिधिसभामा कुरा उठेको छ । राष्ट्रियसभामा कुरा उठेको छ । त्यसको सत्यतथ्य छानबिनका लागि हामीले संसदीय समिति बनाइयोस् भनेर आवाज उठाएका छौँ,” उनले भने, “सरकार मौन छ । हतारमा त्यो बजेट पास गर्न सरकार लाग्छ । तर, उठेका विषयमा न जवाफ दिन्छ न संसदीय छानबिन समिति बनाउन उसले आँट गर्छ । वास्तवमा अरूजस्तो मुलुक हुन्थ्यो भने आज हाम्रो देशको अर्थमन्त्री मन्त्री पदमा के कारागारमा बस्नुपर्ने अवस्था हुन्थ्यो । देशप्रतिको जघन्य अपरोध हो त्यो ।”

उनले थपे, अनधिकृत व्यक्तिलाई बजेट निर्माणजस्तो कुरोमा, त्यो राजस्वको बाँडफाँड कसरी गरिन्छ, त्यसका दरहरू कसरी निर्धारण गरिन्छ, हामी सबैले जानेबुझेकै कुरा हो । त्यस्तो ठाउँमा अनधिकृत व्यक्तिलाई लिएर आएर काम गराइन्छ । त्यसको छानबिन समितिमार्फत गरौँ भन्दा सरकार डराउँछ । र, सरकार अर्थमन्त्रीलाई कारबाही गर्न उद्यत हुँदैन । सांस्कृतिक मन्त्रीले जे बोले पनि हुन्छ यो देशमा । कारबाही हुँदैन । लुम्बिनी प्रदेशकी राज्यमन्त्री उदण्डता मच्चाएकी छिन् । सरकार मौन छ ।”

सांसद श्रेष्ठले संस्कृति, पर्यटन तथा नागरिक उडड्यनमन्त्री प्रेमबहादुर आलेलाई पनि जथाभावी बोल्दै हिँड्ने छुट दिएको भन्दै सरकारको कडा आलोचना गरे ।