काठमाडौं । नेकपा (एमाले)ले अर्थमन्त्री जनार्दन शर्मा विवादमा तानिएको विषयमा छानविन गर्न संसदीय समिति गठन नभएसम्म संसद् चल्न नदिने बताएको छ । मंगलबार एमालेका प्रमुख सचेतक विशाल भट्टराईले प्रतिनिधि सभाको बैठकमा अर्थमन्त्री शर्माको राजीनामा माग्दै छानविनका लागि संसदीय समिति गठन हुनुपर्ने माग गरेका हुन् ।

छानविन समितिबाट अर्थमन्त्रीलाई लागेको आरोप गलत सावित भएमा आफूहरू पछि हट्न तयार रहेको उनले बताए ।

"पहिले नै अर्थमन्त्रीको राजीनामा आइसक्नुपर्थ्यो । अब सभामुखको अग्रसरतामा एउटा संसदीय समिति गठन होस् । उहाँ सही सावित हुनुभएछ भने हामी पछि हटौँला । म एमालेको तर्फबाट भन्न चाहन्छु, संसदीय छानविन समिति गठन भएपछि मात्रै यो सदन अगाडि बढ्छ," भट्टराईले भने । 

त्यसपछि सभामुखले बुधबार बिहान ११ बजे बस्नेगरी बैठक स्थगित गरेका थिए ।

जेठ १४ गते राति बजेट निर्माणका क्रममा अनाधिकृत व्यक्तिले भनेको आधारमा करमा हेरफेर गरिएको आरोप लागेपछि उनी विवादमा तानिएका हुन् ।

अर्थमन्त्री शर्माले भने आफूमाथि लागेको आरोपको खण्डन गर्दै आएका छन् ।