काठमाडौं । आगामी आर्थिक वर्ष २०७९÷८० को बजेट सार्वजनिक भएपछि मात्रै  अर्थतन्त्रको ऐना मानिने सेयर बजार परिसूचक नेप्सेमा २०० अंकभन्दा माथिले घटेको छ । जेठ १५ गते आइतबार अर्थमन्त्री शर्माले बजेट प्रस्तुत गर्दा २२२३.७८ अंकमा रहेको नेप्से त्यसयताको ७ कारोबार दिनमा लगातार घटिरहेको छ । समग्रमा भने आठौँ दिन पनि नेप्सेमा लगातार गिरावट भएको छ ।

साताको दोस्रो कारोबार दिन मंगलबार नेप्से ४५.५९ अंकले गिरावट हुँदा २०२०.२३ अंकमा बन्द भएको छ । बजेट पछिको सात कारोबार दिनमा नेप्से २०३.५५ अंकले घटेको हो । जेठ १३ गतेयता कारोबार भएको हरेक दिन नेप्सेमा गिरावट भइरहेको छ ।  पछिल्लो ८ दिनमा मात्रै नेप्से २१९.३७ अंकले घट्यो । 
बैंकिङ प्रणालीमा लगानीयोग्य पँुजीको अभाव र अर्थतन्त्रको बाह्य क्षेत्रमा बढ्दो दबाबका बीच राष्ट्र बैंकले आगामी मौद्रिक नीति संकुचित बनाउन संकेत गरेको छ । सेयर बजारलाई प्रभाव पार्ने तरलताको चरम अभाव र ब्याजदर निरन्तर वृद्धि हुँदा पछिल्लो समय सेयर बजारमा निरन्तर रूपमा गिरावट देखिएको हो । 

मंगलबार नेप्सेसँगै सबै उपसूचकमा गिरावट आएको छ । आजको दिन बजारमा १ अर्ब ३१ करोड २८ लाखको कारोबार भएको छ । आज कारोबार भएकोमध्ये एनआइसी एशिया बैंकको सवार्धिक ६ करोड १२ लाखको कारोबार हुँदा कुमारी बैंकको ५ करोड ८८ लाख र हिमालयन डिस्टिलरीको ३ करोड ७५ लाखको कारोबार भएको छ । 

आज दिनभर बजारमा १९६ कम्पनीका सेयर कारोबार भएकोमा १८१ कम्पनीको  सेयरमूल्य  घटेको छ । यस्तै, १५ कम्पनीको  सेयरमूल्य भने स्थिर रहेको छ । 
आज कारोबार भएकोमध्ये हालै सार्वजनिक निष्कासन भएर नेप्सेमा सूचीकृत भएका उपकार लघुवित्त र बलेफी हाइड्रोपावरको  सेयरमूल्य बढेर सकारात्मक सर्किट लेभलमा बन्द भएको छ । यस्तै माउन्टेन हाइड्रो नेपालको सेयरमूल्य ३.८२ प्रतिशतले गिरावट भएको छ । 

यता, मर्जर असफल भएर एक वर्षपछि कारोबार खुलेको हिमालयन बैंकको सेयरमूल्य लगातार दोस्रो दिन पनि घटेर नकारात्मक सर्किट लेभलमा बन्द भएको छ । यस्तै, सपोर्ट माइक्रोफाइनान्सको सेयरमूल्य ५.९९ प्रतिशतले गिरावट हुँदा समता घरेलु लघुवित्तको ५.६३ प्रतिशतले घटेको छ ।