तनहुँ । पृथ्वी राजमार्ग सडकखण्डअन्तर्गत तनहुँको व्यास नगरपालिका–१२, देउरालीमा आज साँझ सवारी दुर्घटना हुँदा एकजनाको मृत्यु भएको छ ।

प्रहरीले दिएको जानकारीअनुसार मृत्यु हुनेमा जिल्लाको बन्दीपुर–१ निवासी २१ वर्षीय स्कुटर चालक ईश्वर क्षेत्री रहेका छन् । टिपरको ठक्करबाट सख्त घाइते क्षेत्रीको दमौली अस्पतालमा उपचारका क्रममा मृत्यु भएको हो ।

दमौलीबाट डुम्रेतर्फ जाँदै गरेको ग१क ५५३३ नम्बरको टिपरले विपरीत दिशामा गुडिरहेको ग१५प १४८४ नम्बरको स्कुटरलाई ठक्कर दिँदा उक्त दुर्घटना भएको हो । टिपर चालकलाई नियन्त्रणमा लिएर थप अनुसन्धान भइरहेको प्रहरी नायब उपरीक्षक युवराज खड्काले जानकारी दिए

घटनापश्चात् स्थानीयवासीले पृथ्वी राजमार्ग सडकखण्ड अवरुद्ध गरेका छन् । रासस