काठमाडौं । नेकपा (एमाले)का सांसद प्रदीप ज्ञवालीले सरकारको क्रियाकलापले विदेशी लगानीकर्तालाई हतोत्साही बनाइरहेको बताएका छन् ।

बिहीबारको प्रतिनिधिसभा बैठकमा उनले भने, “विदेशी लगानी बढाउँछु भन्दै हुनुहुन्छ, तर तपाईंका क्रियाकलापले विदेशी लगानीकर्तालाई त लगातार हतोत्साही गराइरहेको छ ।”

ज्ञवालीले पहिले एमसीसी परियोजना गिजोलिएको र अहिले बूढीगण्डकी जलविद्युत् आयोजनालाई गिजोलिरहेको आरोप लगाए । “हिजो गिजोल्नसम्म गिजोलियो एमसीसी । पछि के देख्नुभो तपाईंहरूले, सत्ता जान्छ भन्ने ठान्नुभो कि के भयो ? कुरा त जहाँको त्यहीँ छ । पारित गर्नुभयो, धन्यवाद ।  आज फेरि त्यसैगरी बूढीगण्डकी गिजोल्दै हुनुहुन्छ । यो गिजोल्ने कुरामा किन आनन्द आउँछ ?,” ज्ञवालीले प्रश्न गरे ।

बूढीगण्डकी पहिले चीनलाई दिने भनेर सम्झौता गरिएको र अहिले के नपाएर नदिने भनेको भन्दै प्रश्न समेत गरे । “हिजो के देखर चीनलाई दिने भन्यौँ ? आज के देखेनौँ, के पाएनौँ र नदिने भन्यौँ ?,” उनले प्रश्न गरे ।