काठमाडौं । सत्ता साझेदार दल नेकपा माओवादी केन्द्रका सांसद वर्षमान पुनले निर्यातमुखी कृषि क्षेत्रलाई सरकारको आगामी वर्षको बजेटले प्राथमिकता दिएको बताएका छन् । 

मंगलबार प्रतिनिधि सभाको बैठकमा सरकारले आगामी वर्षका लागि प्रस्तुत गरेको बजेटमाथिको सैद्धान्तिक छलफलमा बोल्दै उनले बजेटको प्राथमिक क्षेत्रमा कृषिको रूपान्तरण पर्नु आफैँमा महत्त्वपूर्ण रहेको बताए । साथै, उनले कृषिको माध्यमबाट थप पाँच लाख रोजगारी सिर्जना गर्ने भन्ने कुरामा कसैले विरोध गर्नु जरुरी नरहेको बताए । 

“धान मकै, गहुँ लगायतका कृषि उपजको आयात ३० प्रतिशतले घटाउने कुरा सही छ । ८ लाख निरपेक्ष गरिबीमुनि रहेकाहरूलाई माथि उठाउने सकारात्मक छ,” उनले भने,“किसान पेन्सन कार्यक्रमले कृषि क्षेत्रलाई आकर्षित बनाउने योजना लिएको छ । वर्षेभरी दुख गरे पनि खान नपाउने समस्या समाधान गर्न वैज्ञानिक कृषि प्रणालीको प्राथमिकता बजेटमा देखिनु महत्त्वपूर्ण हो ।” 

सांसद पुनले बजेटका सिद्धान्त र प्राथमिकता र सरकारको नीति तथा कार्यक्रम र बजेट एउटै दिशानिर्देशमा आएकाले पनि बजेट समयमै कार्यान्वयन हुने र अपेक्षित लक्ष्य हासिल गर्नेमा आफू विश्वस्त रहेको बताए ।