काठमाडौं । उद्योग, वाणिज्य तथा आपूर्तिमन्त्री दिलेन्द्रप्रसाद बडुले निजी क्षेत्र सक्रिय नभएसम्म आर्थिक विकास गर्न नसकिने बताएका छन् । नेपाल उद्योग परिसंघले आयोजना गरेको ‘मेक इन नेपाल स्वदेशी सम्मेलन २०२२’ मा औद्योगीकरणका लागि निजी क्षेत्र सक्रिय हुनुपर्ने र निजी क्षेत्रलाई विश्वासमा लिएर सरकार अगाडि बढ्ने बताए ।

स्वदेशी उत्पादन र उपभोग बढाउन आवश्यक रहेको भन्दै उनले २०७९–२०८९ एक दशकलाई स्वदेशी उपभोग अभियान सञ्चालन गर्न लागिएको बताए ।

स्वदेशमै उत्पादन हुन सक्ने वस्तु पनि आयात हुनु चिन्ताजनक रहेको रहेको उनले बताए । “दाल, भात, तरकारी, अचार सबै आयात भइरहेको छ” उनले भने, “स्वदेशी उत्पादन बढाउनै पर्छ, निर्यात बढाउनै पर्छ । निर्यात प्रोत्साहन र आयात कम गर्ने वित्तीय र मौद्रिक नीति हुनै पर्छ ।”

उनले निजी क्षेत्रको सहभागितामा रुग्ण उद्योग सञ्चालनको गृहकार्य भइरहेको बताउँदै स्वदेशी उत्पादन र स्वदेशमै रोजगारी बढाए मात्रै अर्थतन्त्रमा सुधार आउने उनले विश्वास व्यक्त गरे ।