बुटवल । रुपन्देहीको तिलोत्तमा नगरपालिकाको मत गणना स्थलमा वडा सदस्यका उमेदवारले नै मदिरा सेवन गरी होहल्ला गरेपछि मतगणना पुनः अवरुद्ध भएको छ ।

वडा नं. ५ का वडा सदस्य उमेदवार नेकपा (एमाले)का मनिष कुमार अधिकारीले मदिरा सेवन गरी गणना स्थलमा पसेर होहल्ला गर्न थालेपछि केहीबेर स्थिति तनावग्रस्त भएको थियो ।

मदिराको नसामा रहेका अधिकारीले हिजो बिहानदेखि सिल गरेर राखिएको मतपत्र सहितको कोठाको ढोका जबरजस्ती खोल्न लगाएर फोटो खिच्दै गरेको अन्य दलका प्रतिनिधिले देखेपछि उनलाई प्रहरीले नियन्त्रणमा लिएको थियो । 

प्रहरीले अधिकारीलाई अहिले मतगणना स्थलबाट बाहिर निकालेको छ । स्थिति सामान्य बन्दै गएको र केही बेरमा मतगणना सुरु गर्ने तयारी भइरहेको निर्वाचन अधिकृतको कार्यालयले जनाएको छ । 
यसअघि गणक बसेका तिलोत्तमा नगरपालिकाका कर्मचारीले रुख चिन्हमा आएको मत घटाउने र सुर्य चिन्हमा आएको मत बढाउने गरेको पाइएपछि मंगलबार बिहानै देखि तिलोत्तमाको मत गणना रोकिएको थियो । 

सत्ता गठबन्धका पाँच दलसहित राप्रपा र राष्ट्रिय जनमुक्ति पार्टीले कर्मचारीले बदमासी गरेका वडाको पुनः मतगणनाको माग गरेका थिए । निर्वाचन आयोगले सात दलको मागको सुनुवाइ गर्दै पुनः मतगणना गर्न भनेपछि आज राति ९ बजेबाट मतगणना सुरु गर्ने सहमति सर्वदलीय बैठकले गरेको थियो ।