काठमाडौं । नेकपा (एकीकृत समाजवादी)का अध्यक्ष माधव नेपालको गृहनगर रौतहटको गौर नगरपालिका नेकपा (एकीकृत समाजवादी)ले जितेको छ । बहुमत वडासहित नगर एसले जितेको हो । 

पार्टीबाट उमेदवार बनेका शम्भू साह विजयी भए । उनले ६ हजार ३८१ मत पाएको जिल्ला निर्वाचन कार्यालयले जानकारी दिएको छ । दोस्रो भएको लोसपाले ३ हजार ७५५ मत प्राप्त गरेको छ । 

लोसपाका अजय कुमार गुप्ता उमेदवार थिए । यहाँ तेस्रो शक्ति नेपाली कांग्रेस बन्यो । कांग्रेसका मोहन कुमार यादवले ३ हजार २११ मत प्राप्त गरे । चौथो स्थानमा रहेको एमालेले ८१७ मत मात्र प्राप्त गर्यो । एमालेबाट अनील कुमार मिश्र उमेदवार थिए । 

उपप्रमुखमा पनि नेकपा(एस) नै विजयी भयो । पार्टीबाट उमेदवार बनेकी शैलकुमारी साहले ४ हजार ८०९ मत प्राप्त गरिन् । दोस्रो स्थानमा रहेकी कांग्रेस उमेदवार शाहजान खातुनले ३ हजार ६८५ मत प्राप्त गर्दा लोसपा नेतृ उषा झाले २ हजार ५६० मत प्राप्त गर्दै तेस्रो बनिन् । 

चौथो स्थानमा जसपा आउँदा एमाले भने पाँचौ स्थानमा रह्यो ।