वीरगञ्ज । पर्साको छिपहरमाई गाउँपालिका मतगणनामा अनियमितता भएको भन्दै पुनः निर्वाचन गर्न माग भएको छ । गाउँ पालिकाको अध्यक्षका उमेदवार नवीनकुमार सिंहले मतगणनामा अनियमितता भएको आरोप लगाएका हुन्  । 

नेपाली कांग्रेसबाट गाउँपालिका अध्यक्षका उमेदवार बनेका सिंहले  सोमबार वीरगञ्जमा पत्रकार सम्मेलन गर्दै गाउँपालिकाको मतगणना गर्दा करारमा नियुक्ति गरिएका कर्मचारीको संलग्नताले अनियमितता भएको बताए ।

उनले निवर्तमान गाउँपालिका अध्यक्ष मनोजकुमार गुप्ताले नै करारमा नियुक्ति गरेका कम्प्युटर अप्रेटर सञ्जित यादव र पालिकाका निमित्त प्रमुख प्रशासकीय अधिकृत शम्भु साहले मत गणनामा षड्यन्त्र गरेको आरोप लगाएका छन् । 

मतगणना गर्दा १ हजार ५ सय ९० आएकोमा निर्वाचन आयोगको वेबसाइटमा इन्ट्री गर्दा बढाएर १ हजार ६ सय २० बनाएको सिंहको आरोप छ । करारमा नियुक्ति गरेका कर्मचारीलाई मतगणनामा सहभागी नबनाउन उनले माग गरेका छन् ।

त्यस्तै, छिपहरमाई गाउँपालिका–२ मा मृत्यु भएका र वैदेशिक रोजगारीमा गएका व्यक्तिको नाममा पनि मत आफैँ हालिदिएको आरोप सिंहको छ । उनले निर्वाचन आयोगबाट रुजु भएको मतदाता नामावली उपलब्ध गराई सो ठाउँमा पुनः निर्वाचन गराउनुपर्ने बताए ।

छिपहरमाई गाउँपालिका वडा नम्बर १ का ३ वटा बुथकै मत गणना भइसकेको छ । वडा नम्बर २ को ५ वटा बुथमध्ये ३ वटाको गणना हुँदै गर्दा विवाद उत्पन्न भएर मतगणना रोकिएको छ ।