वीरगञ्ज । मधेश प्रदेशको एकमात्र महानगरपालिका वीरगञ्जको मेयरमा पाँच दलीय गठबन्धनका साझा उम्मेदवार राजेशमान सिंहले अग्रता कायमै राखेका छन् ।
शनिबार दिउँसो मतगणनाको पहिलो नतिजा आएदेखि अग्रता लिएका सिंहले आइतबार बिहानसम्म अग्रता कायमै राखेका हुन् ।
सिंहले हालसम्म १ हजार ३ सय ७३ मत प्राप्त गर्दै अग्रता कायम राखेका हुन् । नेकपा एमाले र लोसपाका साझा उमेदवार विजयकुमार सरावगीले ६ सय ५९ मत प्राप्त गरेका छन् ।
वीरगञ्ज महानगरपालिका वडा नम्बर १, २, ३१ र ३२ को २ हजार २ सय ६९ मत गणना गर्दा सम्म गठबन्धनका उम्मेदवार सिंह अगाडि छन् ।
![Global Ime bank](https://baahrakhari.com/uploads/bigyaapan/30885600.gif)
निवर्तमान मेयरसमेत रहेका सरावगी पाँच दलीय गठबन्धनका सिंहसँग ७ सय १४ मतले पछाडि रहेको निर्वाचन अधिकृतको कार्यालयले जनाएको छ । प्रमुख निर्वाचन अधिकृत धर्मराज पौडेलका अनुसार चारवटै वडाबाट मेयरमा अहिलेसम्म १ सय ५२ मत बदर भएको छ ।
त्यस्तै राप्रपाका गिरिश गिरीले हालसम्म ४१ मत मात्र प्राप्त गरेका छन् ।
त्यसैगरी उपमेयरमा पनि पाँच दलीय गठबन्धनका साझा उम्मेदवार इम्तियाज आलमले अग्रता लिएका छन् । आलमले १ हजार १२ मत प्राप्त गर्दा उनका निकटतम प्रतिद्वन्द्वी उनीसँग ८ सय ५२ मतको अन्तरले पछाडि छन् ।
निकटम प्रतिद्विन्द्वी एमाले र लोसपाका साझा उम्मेदवार पुरुषोत्तमलाल झाले केवल १ सय ६० मत प्राप्त गरेका छन् । झा पछाडि राप्रपाकी विना जयसवाल कुर्मीले ५५ र स्वतन्त्र उम्मेदवार रम्भा मिश्राले १५ मत प्राप्त गरेकी छिन् । उपमेयरमा ३ सय २१ मत बदर भएको प्रमुख निर्वाचन अधिकृत पौडेलले जानकारी दिए ।