काठमाडौं ।  सेयर बजार परिसूचक नेप्से लगातार तेस्रो कारोबार दिन पनि बढेको छ ।

गएको सातासम्म लगातार घटेर बिहीबार १५ महिनायताकै न्यून विन्दु २२३८.६२ अंकसम्म झरेको नेप्से आइतबारबाट लगातार बढिरहेको छ । आइतबार करिब १८ अंकले बढेको नेप्से सोमबार १२ अंकले बढेर बन्द भएको थियो ।

आज लगातार तेस्रो दिन पनि बढेको नेप्से ३३.१६ अंकले वृद्धि भएर २३१३ अंकमा बन्द भएको छ । पछिल्ला तीन कारोबार दिनमा नेप्से ७४.३८ अंकले बढेको हो । नेप्से १.९५ प्रतिशतले वृद्धि भए पनि कारोबार रकममा भने उत्साह देखिएको छैन ।

सोमबार दिनभर एक अर्ब ३९ करोड रुपैयाँबराबरको कारोबार भएको बजारमा आज एक अर्ब ३५ करोड ६७ लाखको कारोबार भएको छ । आज बजारमा सबै उपसूचकमा हरियाली छाउँदा सेन्सिटिभ इन्डेक्स ७.६७ अंकले बढेर ४४७.१४ अंकमा बन्द भएको छ ।

आज बजारमा ङ्यादी ग्रुप पावरको नौ करोड ९८ लाखको कारोबार हुँदा अरुण भ्याली हाइड्रोपावरको चार करोड २५ लाख र नेपाल दूरसञ्चार कम्पनीको दुई करोड ८३ लाखको सेयर कारोबार भएको छ ।

आज दिनभर बजारमा १९४ कम्पनीको सेयर कारोबारमा आएकामा १८१ कम्पनीको सेयर मूल्य बढेको छ भने नौ कम्पनीको सेयर मूल्य घटेको छ ।  चार कम्पनीको सेयर मूल्य भने स्थिर रह्यो ।

कारोबारमा आएका मध्ये वरुण हाइड्रोपावर, ङ्यादी ग्रुप पावर, जाल्पा सामुदायिक लघुवित्त र युनिभर्स पावरको सेयर मूल्य बढेर सर्किट लेभलमा बन्द हुँदा दिव्येश्वरी हाइड्रोपावरको सेयर मूल्य ९.१७ प्रतिशतले बढेको छ ।

उन्नति सहकार्य लघुवित्तको सेयर मूल्य २.५२ प्रतिशतले गिरावट हुँदा गुराँस लघुवित्तको सेयर मूल्य १.६१ प्रतिशतले गिरावट भएको छ ।