काठमाडौं । वित्तीय क्षेत्रले भोग्दै आएको तरलता समस्या समाधान हुन समय लाग्ने सरोकारवालाहरूले बताएका छन् । तरलता समस्या तत्काल समाधान हुने संकेत नदेखिएको उनीहरूको भनाइ छ । नेपाल आर्थिक पत्रकार समाज (सेजन) ले बुधबार गरेको अर्थतन्त्रसँग सम्बन्धित कार्यक्रममा नेपाल बैंकर्स संघका उपाध्यक्ष सुनील केसीले तरलता संकटको समस्या आगामी आर्थिक वर्षमा पनि यथावत् रहने संकेत देखिएको बताए ।

चालु आर्थिक वर्षको ९ महिनामा बैंक तथा वित्तीय संस्थाले करिब साढे ४ खर्ब रुपैयाँ बराबर कर्जा प्रवाह गरिसकेको अवस्थामा करिब १ खर्ब ६० अर्ब रुपैयाँ मात्र निक्षेप संकलन भएको उनले बताए । आगामी वर्ष १५ प्रतिशतको मात्रै कर्जा विस्तार गर्नको लागि पनि करिब साढे ७ खर्ब रुपैयाँ चाहिने उनले बताए । “तर, त्यत्रो रकमको स्रोत सबै बैंकले मात्रै जुटाउन सक्दैन । यसका लागि राज्यले नै पहल गर्नुपर्छ,” उनले भने ।

बैंकहरूले प्रवाह गरेको कर्जा उत्पादनशील क्षेत्रमा भन्दा अन्यत्र बढी भएको भन्ने विषयमा उनले भने, “बैंकहरूले कुल कर्जाको ५० प्रतिशत बढी रकम प्राथमिकता क्षेत्रमा प्रवाह गरेको छ । राष्ट्र बैंकले तोकेको प्राथमिकता प्राप्त क्षेत्रमा बैंकहरूले कर्जा प्रवाह गरिनै रहेका छन् ।”

नेपाल बैंकर्स संघका पूर्वअध्यक्ष भुवन दाहालले पनि तत्काल तरलता संकट समाधान हुने नदेखिएको बताए ।