काठमाडौं । नेपाल उद्योग वाणिज्य महासंघका अध्यक्ष शेखर गोल्छाले सरकार राजस्वमुखी हुँदा आर्थिक क्षेत्र सधैँ दबाबमा पर्ने गरेको बताएका छन् ।

बुधबार काठमाडौंमा नेपाल आर्थिक पत्रकार समाज (सेजन)ले गरेको कार्यक्रममा अर्थतन्त्रको सबैभन्दा ठूलो स्टेकहोल्डर निजी क्षेत्र भएको भन्दै उनले निजी क्षेत्र समस्या समाधानका लागि सरकारसँग मिलेर काम गर्न चाहेको बताए ।

उनले देशको अर्थतन्त्र श्रीलंकाको जस्तो बाटोमा कुनै हालतमा नभएको बताए । “विदेशी मुद्रा सञ्चितिमा दबाब परेको हो, त्यसलाई कसरी बढाउन सकिन्छ भन्नेतर्फ पहल हुन आवश्यक छ । अर्थतन्त्र श्रीलंकाको जस्तो बाटोमा कुनै हालतमा छैन,” उनले भने ।

विदेशी मुद्रा सञ्चिति बढाउन रेमिट्यान्स बढाउनेतर्फ पहल गरिनुपर्ने उनको भनाइ छ । त्यस्तै, निर्यात प्रवद्र्धन गर्ने र वैदेशिक लगानी आकर्षित गर्नुपर्नेमा उनले जोड दिए ।

कार्यक्रममा बैंकबाट भएको ऋण विस्तार सही ठाउँमा छैन भन्ने विज्ञको भनाइमा उनले भने, “ऋण विस्तार सही ठाउँमा गएको छ/छैन भनेर निजी क्षेत्र र बैंकले हेर्न सक्दैनन्, क्षमता पनि छैन । कहाँ गएको छ भनेर हेर्न नसक्नु त नियामकको कमजोरी हो ।”