काठमाडौं । नेकपा (एमाले)बाट राजीनामा दिएर केही समययता राजनीतिमा निष्क्रय रहेका वामदेव गौतमले नेकपा (एकीकृत समाजवादी)को चुनावी गीत लेखिदिएका छन् ।

उनको शब्दमा तयार भएको चुनावी गीत ‘जनता जगाउने कलममा छाप लगाउने’ मंगलबार सार्वजनिक भएको छ । 

कृष्ण केसी र जुना श्रीष मगरको स्वर रहेको गीतमा संगीत कृष्ण केसीले दिएका छन् । 

गौतम नेकपा विभाजनयता नै पार्टी एकता राष्ट्रिय अभियान सञ्चालन गरिरहेका छन् । उनी पूर्व पार्टी एमालेमा पनि फर्किएका छैनन् भने एमालेबाट विभाजन भएर बनेको दल एकीकृत समाजवादीमा पनि प्रवेश गरेका छैनन् ।

पछिल्लो समय मौन रहेका गौतमले एकीकृत समाजवादीको चुनावी गीत लेखेका हुन् ।