बेइजिङ । चीनमा ठूलो व्यावसायिक भवन भत्किँदा कम्तीमा २३ मानिस भवनभित्रै च्यापिएका छन् ।

देशको हुनान प्रान्तमा पर्ने चाङशा सहरमा रहेको भवन भत्किएको र कम्तीमा २३ जना च्यापिएको अधिकारीहरूले जनाएका छन् । भत्किएको आठतले भवनमा होटेल, अर्पाटमेन्ट, सिनेमा हललगायत रहेका थिए ।

च्यापिएको ठाउँबाट मानिसलाई निकाल्ने प्रयास भइरहेको चाङशा नगरका मेयर झेङ जियाङछीनले जानकारी दिए । “भत्किएको भवनभित्र च्यापिएका व्यक्तिहरूलाई निकाल्नका लागि उद्धारकर्मीहरूले अथक मिहिनेत गर्नुभएको छ,” मेयर जियाङ्छीले भने ।

च्यापिएको ठाउँबाट पाँचजनालाई उद्धार गरिसकिएको र अहिलेसम्म मृत अवस्थाको कोही नभेटिएको पनि उनले जानकारी दिए ।

“अहिलेसम्म मृत्यु भएको कोही भेटिएको छैन, पाँचजनालाई जीवितै उद्धार गरिएको छ । आशा गरौँ, अरू च्यापिएकोलाई पनि जीवितै उद्धार गर्न सकिनेछ,” उनले भने । रासस/एएफपी