काठमाडौं । सत्तारूढ दल नेपाली कांग्रेसमा विराटनगर महानगरपालिका र ललितपुर महानगरपालिकाको मेयरको टिकट विवाद चर्किएको छ । उमेदवारहरूको टुंगो लगाउन शनिबार राति बालुवाटारमा बसेको शीर्ष नेताहरूको बैठकमा पनि सहमति जुटेन ।

भोलि बिहान ९ बजे बस्ने गरी कांग्रेस शीर्ष नेताहरूको आजको अनौपचारिक बैठक सकिएको हो । एक पदाधिकारीले अहिले विराटनगर र ललितपुरको मेयरको टिकट विवाद उत्कर्षमा पुगेको बताए ।

प्रधानमन्त्री समेत रहेका पार्टी सभापति शेरबहादुर देउवाले विराटनगरको मेयरमा अमृत अर्यालको नाम अगाडि सारेका छन् । नेता कृष्णप्रसाद सिटौला देउवाको समर्थन जुटाएर भीम पराजुलीलाई दोहोर्‍याउने दाउमा छन् । नेता शेखर कोइराला भने नागेश कोइरालाको पक्षमा अडिग छन् ।

ललितपुरमा पनि सहमति जुट्न सकेको छैन । चिरिबाबु दोहोर्‍याउने पक्षमा संस्थापन समूह छ भने शेखर समूह प्रेमकृष्ण महर्जनको पक्षमा छ ।

“दिनभरि बैठक हुन पाएन । सभापतिज्यू भेटघाट र गठबन्धनको बैठकमा व्यस्त हुनुभयो । साइड मिटिङ धेरै भयो । केही पार लगाउन सकिएन । अब बिहान (भोलि) ९ बजे बस्ने गरेर उठ्यौँ," एक नेताले बाह्रखरीसित भने ।

ती नेताका अनुसार वीरगन्जको विषयमा कुरा भएको छैन । "काठमाडौं र भरतपुरमा टुंगियो । पोखरामा महिलालाई दिए कोपिला रानाभाट पक्का छ," ती नेताले भने ।

उनका अनुसार नेताहरूबीच अहिलेसम्म काठमाडौं महानगरको मेयरमा कांग्रेस महाधिवेशन प्रतिनिधि एवं नेता प्रकाशमान सिंहकी पत्नी सिर्जना सिंहलाई उमेदवार बनाउने सहमति भएको छ । भरतपुर महानगरको उपमेयरमा चित्रसेन अधिकारीलाई उमेदवार बनाउने सहमति भएको छ ।

पाँचदलीय सत्ता गठबन्धनले चुनावी तालमेल गर्दा कांग्रेसको भागमा काठमाडौं, ललितपुर र विराटनगरको मेयर परेको छ । केही पालिकाको उपमेयर कांग्रेसको भागमा परेको छ ।

दलहरू यही वैशाख ३० गते हुने स्थानीय तह निर्वाचनका लागि आज वा भोलिसम्ममा उमेदवार टुंगो लगाउनैपर्ने दबाबमा छन् । निर्वाचन आयोगले वैशाख ११ र १२ गते उमेदवारको मनोनयनपत्र दर्ताका लागि समय निर्धारण गरेको छ ।