विराटनगर । जनता समाजवादी पार्टी (जसपा)का नेता उमेश यादवले साधारण सदस्यसहित नरहने गरी पार्टी परित्याग गरेको घोषणा गरेका छन् ।

आज दिउँसो विराटनगरमा पत्रकार सम्मेलन गरी यादवले आफू अहिल्यैबाट स्वतन्त्र रहेको बताए । यादव पार्टीको संघीय परिषद्का सदस्य हुन् ।

०७४ को स्थानीय तह निर्वाचनमा यादवले विराटनगर महानगरपालिकाको मेयर पदमा प्रतिस्पर्धा गरेका थिए । पार्टीको संगठन राम्रो भए पनि योपटक तालमेलका नाममा कार्यकर्तामाथि अन्याय भएको उनले बताए ।

उनले भने, “म अहिले नै अरू कुनै पार्टीमा जान्नँ । चुनावमा उठ्ने/नउठ्ने भन्ने विषयमा निर्णय गरिसकेको छुइनँ ।"

उनले विराटनगरमा मेयर र उपमेयर नै जित्ने अवस्थामा तालमेल गरेर कार्यकर्तालाई निराश पार्न खोजिएको बताए । जसपाले आफ्नो भागै काटेर तालमेल गर्नुको अर्थ नरहेको उनको भनाइ छ ।

तालमेल नगर्नका लागि आग्रह गरे पनि वास्ता नगरिएकोले पार्टी परित्याग गरेको यादवले बताए ।