न्युयोर्क । पूर्व हेभिवेट बक्सर माइक टाइसनले विमानभित्र यात्रु कुटेका छन् । आफूमाथि पानीको बोटल फ्याक्ने एकजना यात्रुलाई टाइसनले मुक्का प्रहार गरेको उनका प्रवक्ताले बताए ।

विमानमा खिचिएको भिडियोमा आफ्नो सिटमा अडेस लगाएर टाइसनले एक अपरिचित पुरुषलाई पिटिरहेको देखिन्छन् । 

बक्सिङ हल अफ फामरका प्रवक्ताले टाइसनलाई निहुँ खोजिरहेका एकजना आक्रामक यात्रुसँग उनको झडप भएको पुुष्टि गरेका छन् । तत्काल बोलाइएका प्रहरीले ती दुवै जनालाई केही समय हिरासतमा लिएको थियो ।

अमेरिकाको सान फ्रान्सिस्को अन्तर्राष्ट्रिय विमानस्थलमा भएको यस घटनामा ती व्यक्तिलाई सामान्य चोटपटक मात्र लागेको बताइएको छ । प्रहरीले घटनामा संलग्न भनेर केहीबेर हिरासतमा लिएर छाडेका दुवैको परिचय सार्वजनिक गरेको थिएन । 

बुधवार राति सान फ्रान्सिस्कोबाट फ्लोरिडा तर्फ उड्न लागेको जेट ब्ल्यु एरलायन्सको उडानमा रहेको विमानभित्र यो घटना घटेको हो । टीएमजेडद्वारा सार्वजनिक भएको भिडियो फुटेजमा पानीको बोतल भने देखिदैन ।

सुरुमा टाइसनले ती यात्रुकै अनुरोधमा उनीसँग तस्बिर खिचाएको तर पछि ती यात्रुले टाइसनलाई निरन्तर होच्याउन थालेको बताइएको छ । 

भिडियोमा हातपात भइरहँदा कसैले टाइसनलाई शान्त पार्ने उद्देश्यले ‘माइक ! माइक !’ भनेको सुनिन्छ भने अर्को एक व्यक्तिले उनलाई घचेटेको देखिन्छ । त्यसपछि कुटिएका यात्रुको रगताम्य निधार देखिन्छ । 

टाइसन रिङ भित्र र बाहिर त्यतिकै हिंसात्मक रहने गरेका उदाहरणहरू पाइन्छन् । सन् १९९२ मा बलात्कारको अभियोगमा दोषी ठहरिएपछि उनले तीन वर्ष लामो कारागार सजाय भोगेका थिए । सन् १९९७ मा रिङमा भिडन्तकै क्रममा प्रतिद्वन्द्वीको काननै चुँडिने गरी टोकेको कारण उनलाई खेलका लागि अयोग्य घोषित गरिएको थियो । 
बीबीसीबाट ।