काठमाडौं । शिक्षा, विज्ञान तथा प्रविधि मन्त्रालयले इन्धन खर्चमा मितव्ययिता कायम गर्न निर्देशन दिएको छ ।

मन्त्रालयले मातहतका सबै निकाय केन्द्र, प्रतिष्ठान, आयोग, संस्थान, समिति, बोर्ड, परिषद् तथा कार्यालयलाई इन्धन शीर्षकमा २० प्रतिशतले कटौती गर्न निर्देशन दिएको हो ।

मन्त्रालयले मन्त्रिपरिषद्को गएको चैत ३० गतेको निर्णयानुसार वैदेशिक मुद्राको सञ्चितिमा परेको चापले अनावश्यक आयातमा नियन्त्रण गर्नुपर्ने देखिएको र वैदेशिक मुद्राको ठूलो मात्रा उपयोग इन्धन आयातमा हुने गरेकोले सबै निकायलाई इन्धन शीर्षकमा २० प्रतिशतले कटौती गर्ने निर्णय कार्यान्वयन गर्न निर्देशन दिएको छ ।

यो व्यवस्था आउँदो असार मसान्तसम्मका लागि रहेको मन्त्रालयले जनाएको छ ।