काठमाडौं । नेपालमा वार्षिक करिब दुई लाख महिलाले गर्भपतन गराउने गरेको प्रतिवेदन सार्वजनिक भएको छ । संयुक्त राष्ट्रसंघीय जनसंख्या कोष (यूएनएफपीए)ले गएको मार्च ३० मा सार्वजनिक गरेको प्रतिवेदनले गर्भपतनको यस्तो तथ्यांक देखाएको हो ।

नेपालमा प्रत्येक वर्ष हुने १२ लाख गर्भधारणमध्ये झन्डै आधा अनिच्छत गर्भ रहने गरेको र त्यसमध्ये करिब दुईतिहाइले गर्भपतन गर्ने गरेको प्रतिवेदनमा उल्लेख छ ।

गर्भपतनको प्रमुख कारण चाहना नभएरै गर्भ रहनु, परिवार नियोजनका साधनको नियमित प्रयोग नगर्नु र केहीमा परिवार नियोजनका साधन उपलब्ध नहुनु रहेको  प्रतिवेदनमा उल्लेख छ ।

प्रतिवेदनका अनुसार नेपालमा ४३ प्रतिशत महिलाले मात्रै परिवार नियोजनका साधन प्रयोग गर्ने गरेको, ४४ प्रतिशतले आधुनिक र सुरक्षित साधन प्रयोग नगरेको र प्रजनन उमेरका २४ प्रतिशत महिला परिवार नियोजनका साधन प्रयोग गर्नबाट वञ्चित भएका छन् ।

यूनएनएफपीएले सन् २०१७ को तथ्यांकलाई आधार मानेर वार्षिक १२ लाख गर्भधारण भएको मध्ये अनिच्छित गर्भका कारण तीन लाख ५८ हजारले गर्भपतन गराएको जनाएको छ ।

यस्तै, नेपालमा ४१ प्रतिशत महिलाको विवाह १८ वर्षमुनि नै हुने गरेको र तीमध्ये २३ प्रतिशतले मात्रै परिवार नियोजनाका साधन प्रयोग गर्ने गरेको पनि प्रतिवेदनमा उल्लेख छ ।