काठमाडौं । सूर्य नेपाल गल्फ टुर २०२१/२२ को छैटौं प्रतियोगिता सूर्य नेपाल च्यालेन्ज गल्फ प्रतियोगिता वैशाख ६ गतेबाट रोयल नेपाल गल्फ क्लबमा हुने भएको छ । 

चार दिनसम्म हुने प्रतियोगिता ७२ होलमा खेलाइनेछ । प्रतियोगितामा ५६ खेलाडीले प्रतिस्पर्धा गर्ने प्रोफेसनल गल्फ एसोसिएसनका महासचिव दीपक आचार्यले बताए । उनका अनुसार ५६ मध्ये ३६ व्यावसायिक खेलाडी र २० एमेच्योर खेलाडीले प्रतिस्पर्धा गर्नेछन् । यसपटक बेलायतबाट सात खेलाडीले सहभागिता जनाउनेछन् । 

बेलयातबाट भाग लिन आउनेमा महेन्द्र फगामी, विष्णु थापा, गजेन्द्र गुरुङ, झमक लिम्बु, भक्त शेरचन, राजु तामाङ र देब राना छन् । बेलायतबाट आउने सबै एमेच्योर खेलाडी हुन् । एमेच्योरतर्फ पाँच ह्यान्डिक्याप भन्दा तलका खेलाडीले खेल्ने महासचिव आचार्यले बताए । 

३६ होलपछि कट गरिनेछ । कटबाट २१ शीर्ष व्यावसायिक खेलाडी र ६ शीर्ष एमेच्योर खेलाडी छनोट गरिनेछ । 

प्रतियोगिताको विजेताले एक लाख, उपविजेताले ६५ हजार, र तेस्रो हुनेले ४६ हजार रुपैयाँ पुरस्कार जित्नेछ । त्यस्तै शीर्ष २१ खेलाडीले पनि नगद पुरस्कार जित्नेछन् । 

भुवन नगरकोटी, जयराम श्रेष्ठ, सञ्जय लामा, रवि खड्का, राम थापा र सुवास तामाङलाई उपाधि दाबेदारका रुपमा हेरिएको छ ।