विराटनगर । विराटनगरमा विराट ट्रेड एक्स्पो सुरु भएको छ । मोरङ व्यापार संघको आयोजनामा सो एक्स्पो सुरु भएको सो एक्स्पोको उद्घाटन संस्कृति पर्यटन तथा नागरिक उड्डयनमन्त्री प्रेम आलेले शुक्रबार उद्घाटन गरेका हुन् । 

चैत २६ गतेसम्म चल्ने एक्स्पो उद्घाटन गर्दै मन्त्री आलेले औद्योगिक क्षेत्रमा देखिएका समस्या समाधान गर्न सरकार गम्भीर रहेको बताए । कोरोना महामारी सामान्य बन्दै गएको भन्दै उनले आफू औद्योगिक क्षेत्रमा देखिएका समस्या समाधान हुनेमा विश्वस्त रहेको बताए ।

त्यस्तै, कांग्रेसका नेता मीनेन्द्र रिजालले एक्स्पोले उत्पादनको प्रचारप्रसार र प्रवद्र्धनमा मद्दत पुर्याउने बताए । औद्योगिक क्षेत्र विराटनरको पहिलेको वैभव फर्काउन चुनौती रहेको बताउँदै उनले विराटनगर विमानस्थल क्षमता विस्तारमा जोड दिनुपर्ने बताए । 

विराटनगर महानगरपालिकाका मेयर भीम पराजुलीले सरकारले गरेका निर्णय कार्यान्वयनमा समस्या रहेको बताएका छन् । विराटनगर विमानस्थलमा टर्मिनल भवन ठेक्का प्रक्रिया रद्द भएको बताउँदै उनले यस्तो बताएका हुन् । “विराटनगर विमानस्थलको कार्य अघि बढाउन स्थानीय सरकार, प्रदेश सरकार र संघीय सरकारबीच सहयोगसम्बन्धी सम्झौता भए पनि संघीय सरकारबाट बजेट विनियोजन भएन ।” 

स्थानीय उत्पादन प्रवर्द्धन गर्न र उत्पादित वस्तुको प्रचारप्रसारका लागि एक्स्पो आयोजना गरिएको संघका अध्यक्ष नवीन रिजालले बताए । रिजालले कोरोनाका कारण थिलथिलो भएको औधोगिक क्षेत्रलाई चलायमान गराउन एक्स्पो सहयोगी हुने सुनाए । 

उद्योग संगठन मोरङका अध्यक्ष सुयष प्याकुरेलले विराटनगर विमानस्थल स्तरोन्नतीको काम अघि बढाउनुपर्ने बताए । उनले भने, “विमानस्थल स्तरोन्नती गर्नसके भारतीय पर्यटकको आगमन बढाउन सक्छ ।” उनले आद्योगिक प्रदर्शनीस्थल निर्माणमा बजेट विनियोजन गर्न सरकारको ध्यानाकर्षण गराए । 

नेपाल उद्योग परिसंघ प्रदेश–१ का अध्यक्ष भीम घिमिरेले उद्योग क्षेत्रका समस्या समाधान गर्नुपर्ने बताए । कोरोना महामारीपछि प्रदेश–१ मै ठूलो औद्योगिक तथा व्यापारिक एक्स्पो आयोजना गरिएको जानकारी दिँदै आयोजक समितिका संयोजक एवं संघका उपाध्यक्ष विकासकुमार बेगवानीले २७० स्टल राखिएको बताए । उनले भने, “एक्स्पोमा बंगलादेश र पाकिस्तानमा उत्पादित बस्तुका स्टल पनि छन् ।”

बेगवानीका अनुसार एक्स्पोमा ८० एसीसहित ६० कुलरसहित र १०६ सामान्य स्टल छन् । एसीसहितका स्टलका लागि ६० हजार, कुलर स्टलका लागि ४० हजार र सामान्य स्टलका लागि ३० हजार रुपैयाँँ शुल्क तोकिएको छ ।
 
एक्स्पोमा अटोमोबाइल्सका १०, स्टल रहनेछन् । अटो स्टलका लागि ७० हजार शुल्क निर्धारण गरिएको छ ।

एक्स्पोमा फुडकोर्टका लागि १० स्टल छन् । यसका लागि ६० हजार तोकिएको छ । आकर्षणको रूपमा एक्स्पो परिसर विराटनगर अस्पताल नजिकैको खुला मैदानमा लन्डन ब्रिज, बुर्ज खलिफा, बुर्ज अल अरब, सेन्ट वेसिलजस्ता अन्तर्राष्ट्रिय संरचनाका नमुना राखिएका छन् । 

सेल्फी जोन र साहसिक खेलहरू पनि समावेश गरिएको छ । एक्स्पो आयोजना गर्न तीन करोड खर्च हुने र ४५ करोड बराबरको आर्थिक कारोबार हुने आयोजकको अनुमान छ । एक्स्पो प्रवेश शुल्क एक सय रुपैयाँ तोकिएको छ ।