काठमाडौं । केही दिनअगाडि पहाडको बीच दुर्घटनाग्रस्त भएको चाइना इस्टर्न विमानको घटनास्थलमा मानव अवशेष फेलापारिएको छ । तर, अझै पनि मृतकको संख्याबारे विस्तृत विवरण दिइएको छैन ।

विमानमा १३२ यात्रु सवार थिए, तीमध्ये कोही जीवित नरहेको आशंका गरिएको छ । उद्धारकर्मीले खोजी गरिरहेका छन् । पहाडी भेग र भारी वर्षाका कारण खोजीकार्य अत्यन्तै चुनौतीपूर्ण बनेको बताइएको छ ।

विमानको एउटा ब्ल्याकबक्स पनि भेटिएको छ, जसलाई अनुसन्धानका लागि बेइजिङ पठाइएको छ । दुर्घटनाको कारण अझै खुलेको छैन ।

ककपिट भोइस रेकर्डर पुनः मर्मत गर्न सकिएमा यसबारे केही प्रमाण फेलापर्ने अपेक्षा गरिएको छ । उक्त ब्ल्याकबक्स बाहिरबाट क्षतिग्रस्त भए पनि भित्रका रेकर्ड सुरक्षित नै रहेको बताइएको छ । विमानको अर्को ब्ल्याकबक्सको पनि खोजी भइरहेको छ । उद्धारकर्मीले सुरुकै दिनमा यात्रुका विभिन्न सामान फेलापारेका थिए ।

यसैबीच, बुधबार विमानमा सवार व्यक्तिका परिवारलाई पनि दुर्घटनास्थलमा पुर्‍याइएको छ । उनीहरू सबै तीन दिनदेखि सुखद समाचारको पर्खाइमा थिए ।

उड्डयन विभागको बुधबारको पत्रकार सम्मेलनमा चिनियाँ उडानको रुटमा मौसमसम्बन्धी कुनै अवरोध नभएको बताइएको छ । प्राविधिक समस्याबारे पनि कतै कुनै प्रमाण भेटिएको छैन । उडान ट्रयाक गर्ने डाटामा विमान केही मिनेटमै हजारौँ मिटर तल खसेको देखिएको छ ।

२९ हजार फिटमाथि उडिरहेको विमान दुई मिनेटमै नौ हजार फिट तल झरेर पहाडका बीच दुर्घटनाग्रस्त भएको हो ।

बोइङको विमान अमेरिकामै निर्माण गरिएको हुँदा यससम्बन्धी अनुसन्धानका लागि चीनले अमेरिकी विज्ञलाई पनि सहभागी हुन आग्रह गरेको छ । जो बाइडेन प्रशासनले आफूहरू मद्दतका लागि तयार रहेको जनाएको छ ।

विमानका कर्मचारी र एयर ट्राफिक कन्ट्रोलरबीच दुर्घटना हुनुअगाडिसम्म सामान्य रूपमै सम्पर्क भइरहेको तर अचानक विमान खसेपछि भने सम्पर्कविहीन हुन पुगेको बताइएको छ ।

यो दुर्घटनालाई चिनियाँ उडान क्षेत्रको तीन दशककै ठूलो दुर्घटना बताइएको छ ।