विराटनगर । झापा–११ झापा गोल्डकप फुटबल प्रतियोगिताको फाइनलमा प्रवेश गरेको छ । शनिबार भएको खेलमा संकटा क्लबलाई २–० ले हराउँदै झापा उपाधिनजिक पुगेको हो ।

घरेलु टोली झापाको जितमा दुवै गोल विमल घर्तीमगरले गरे । १६औँ र ५८औँ मिनेटमा गोल गरेका हुन् । म्यान अफ दी म्याच घोषित हुँदै उनले नौ हजार ९९९ रुपैयाँ पुरस्कार पनि पाए ।

योसँगै उपाधिका लागि झापा र त्रिभुवन आर्मी क्लब आमने–सामने हुने पक्का भएको छ । आर्मीले यसअघि नै फाइनलमा स्थान बनाइसकेको छ ।

प्रतियोगिताको फाइनल खेल आउँदो सोमबार हुनेछ । विजेता टोलीले १२ लाख ५५ हजार र उपविजेताले ६ लाख पाँच हजार रुपैयाँ नगद पुरस्कार प्राप्त गर्ने आयोजकले जनाएको छ ।

प्रतियोगिताको सर्वोत्कृष्ट खेलाडीले एकथान मोटरसाइकल पाउनेछन् । उत्कृष्ट गोलकिपर, उत्कृष्ट डिफेन्डर, उत्कृष्ट मिडफिल्डर र उत्कृष्ट प्रशिक्षकलाई २१ हजार रुपैयाँ दिइने आयोजकले जनाएको छ । सर्वाधिक गोलकर्ताले २५ हजार रुपैयाँ पाउनेछन् ।