काठमाडौं । परराष्ट्रमन्त्री डा. नारायण खड्काले युक्रेनमा फसेका ५३३ जना नेपालीलको उद्धार गरिएको बताएका छन् । मन्त्रालयमा सोमाबर पत्रकार सम्मेलन गर्दै उनले रुस र युक्रेनबीचको युद्धका कारण समस्यमा परेका नेपालीहरूको उद्धार गरिएको जानकारी दिए । 

मन्त्री खड्काले युक्रेनमाथि रुसको आक्रमणले विश्व शान्ति खलबल्याउने पनि बताए । नेपालले असंलग्न परराष्ट्र नीतिमै अडिएर युक्रेनको पक्षमा वक्तव्य निकालेको भन्दै उनले मुलुकको परराष्ट्र नीति, सबै राष्ट्रहरूको सार्वभौमिकता र संयुक्त राष्ट्र संघको बडापत्रकोसमेत सम्मान गरिएको बताए । 

“एउटा सार्वभौमसत्ता सम्पन्न राष्ट्रमाथिको हमलाले विश्व शान्ति खल्बलियो । संयुक्त राष्ट्र संघको बडापत्र बमोजिम एउटा सदस्य राष्ट्र हौं । र, यसले ठूला–साना देशको सम्बन्धलाई खल्बल्याउने भएको हुनाले संयुक्त राष्ट्र संघको बडापत्रको सम्मान गर्दै, हामीहरूले वक्तव्य पनि जारी गर्‍यौँ,” उनले भने, “त्यो असंलग्न परराष्ट्र नीतिकै एउटा पाटो हो । सार्वभौमिकताको सम्मान हुनुपर्छ भन्ने हिसाबले, संयुक्त राष्ट्र संघको बडापत्र र अन्तर्राष्ट्रिय कानुनलाई समेत सम्मान गर्दै वक्तव्य निकालिएको हो ।”

मन्त्री खड्काले एमसीसी तथा सत्तागठबन्धनका कारण राजदूत नियुक्तिहरूमा ढिलाए भएको स्वीकार गर्दै रिक्त रहेको देशमा राजदूत नियुक्ति केही दिनभित्रै गरिने बताए । 

साथै उनले चीनसँगको नाका खुलाउने विषयमा छलफल भइरहेको बताए । नाका खुलाउने विषयमा चीनका विदेशमन्त्रीसँग करिब एक घण्टा टेलिफोन संवाद आफूले गरेको उनले जानकारी दिए । 

“उत्तरी नाका खोल्न पहल गरिराखेका छौँ । चीनका विदेश मन्त्री वाङसँग सोही माग राखेर एक घण्टा टेलिफोन वार्ता गरिएको छ ।  चिनिया राजदूतसँग पनि सो नाका खोल्ने विषयमा कुराकानी भएका छन । दुवै देशको हितमा भएकाले सो नाका छिट्टै खुल्ने विश्वास लिएका छौँ ।”