काठमाडौं । नेकपा (एकीकृत समाजवादी)को पहिलो पोलिटब्युरो बैठक सुरु भएको छ । बैठकमा अध्यक्ष माधवकुमार नेपालको प्रतिवेदन पेस भएको छ ।

केन्द्रीय कमिटिका एजेन्डा तय गर्ने तथा राष्ट्रिय राजनीतिको समीक्षा गर्दै पार्टीलाई नीतिगत निर्देशन तय गर्ने बैठकमा एमसीसीको व्याख्यात्मक टिप्पणी र त्यसका विषयमा पार्टीले लिएको बाटोसहितको राजनीतिक प्रतिवेदन पेस भएको हो ।

फागुन २५ गतेको केन्द्रीय कमिटी बैठकमा पालि ब्युरो सदस्यहरूको सुझावसहित पेस हुने प्रतिवेदनमा राष्ट्रिय राजनीतिको समीक्षा र स्थानीय तह निर्वाचनको तयारी प्रमुख रहेको बताइएको छ ।

“पोलिटब्युरो भनेकै राष्ट्रिय राजनीति र नीतिमा मार्गदर्शन गर्ने हो । फागुन २५ गतेका केन्द्रीय कमिटी बैठकका लागि एजेन्डा तय गर्ने काम यही बैठकबाट हुने छ,” पार्टी प्रवक्ता जगन्नाथ खतिवडाले भने, “आसन्न स्थानीय तहमा निर्वाचनमा पार्टीको सम्पूर्ण शक्तिलाई केन्द्रीकृत गर्न लाग्नेछौँ । हामी न झुक्छौँ, न बहकिन्छौँ । हामी राष्ट्रहीतलाई केन्द्रविन्दुमा राखेर काम गर्छौं भन्ने नीति छ ।”

उनले पार्टीले लिएको नीतिमा सबैलाई उत्साहपूर्वक सहभागी गराउँदै परिचालनको कार्यक्रम निर्माण गर्ने बताए । उनले एमसीसीका कारण्ण उत्पन्न विवादमा पार्टीका सबै तहलाई बुझाएर निर्वाचनको तयारीमा जुट्ने पनि जानकारी दिए । 

“एमसीसीलाई व्याख्यात्मक घोषणामार्फत पारित भएपछि पार्टीमा उठेको विवादमा कार्यकर्तालाई एकताबद्ध बनाएर हिँडाउन त्यसको व्याख्यासहित प्रतिवेदन तयार पारिएको छ,” प्रवक्ता खतिवडाले भने, “एमसीसीका विषयमा हामीले निर्णय गरिसकेका छौँ । स्थायी कमिटीको बहुमतले यो निर्णय गरेको हो ।”