काठमाडौं । सत्तारूढ दल नेपाली कांग्रेसका शीर्ष नेताहरूले आउँदो मंसिरअघि नै संघीय संसद्को चुनाव हुन सक्ने बताएका छन् ।

नेता रामचन्द्र पौडेल र महामन्त्री गगनकुमार थापाले प्रमुख प्रतिपक्ष दल नेकपा (एमाले)ले संसद् अवरुद्ध गरिरहे मंसिरअघि नै संघीय संसद्को निर्वाचन गरिने बताएका हुन् ।

शनिबार नेपाल निजामती कर्मचारी युनियन केन्द्रीय कार्यसमितिले काठमाडौंमा गरेको कार्यक्रममा नेता पौडेलले संसद् सुचारु नहुने हो भने चाँडै संघीय संसद्को निर्वाचन गराउन आफूले प्रधानमन्त्री शेरबहादुर देउवालाई सुझाव दिएको बताए । उनले देशलाई अलमलमा राख्न नदिन पनि संसद् नचले नयाँ संसद्का लागि निर्वाचनमा छिटो जानुको विकल्प नरहेको तर्क गरे ।

‘‘मैले त प्रधानमन्त्रीलाई भनिसकेँ, चाँडै संसद सुचारु गर्नुपर्‍यो वा चाँडै संसद् ल्याउनुपर्‍यो । अब यस्तो अलमलमा राख्नु हुँदैन देशलाई,’’ उनले भने, ‘‘म सबैलाई के भन्न चाहन्छु भनेँ, एमसीसी पास गरिएको छ, यसले मुलुकको विकास र समृद्धिले फड्को मार्नेछ । तर, नेपाली जनतालाई यसबारे बुझाउन सक्नुपर्दछ ।’’

महामन्त्री थापाले एमालेले संसद् चल्न नदिए मंसिरअघि नै संघीय संसद्को निर्वाचन हुने र आफ्नो पार्टीले बहुमत ल्याएर पाँच वर्ष मुलुक सानदार ढंगले चलाउने जिकिर गरे । स्थानीय तहको निर्वाचन वैशाख ३० गते नै हुने पनि बताए ।

‘‘वैशाख ३० गते स्थानीय तहको निर्वाचन गराउने हो । त्यसपछि आमचुनाव हुन्छ,’’ उनले भने, ‘‘एमालेले संसद् चल्न दिएन भने मंसिरअघि नै चुनाव हुनसक्छ । हामी निर्वाचनमा जाने हो । सानदार ढंगले बहुमत ल्याएर पाँच वर्ष मुलुक चलाउने हो ।’’