काठमाडौं । त्रिभुवन अन्तर्राष्ट्रिय विमानस्थलको ‘क्यालिब्रेसन फ्लाइट’ जारी छ । क्यालिब्रेसन फ्लाइटका कारण आज बिहान ११ः३० देखि दिउँसो २ः३० बजेसम्मको उडान र अवतरण प्रभावित भएको छ ।

आज क्यालिब्रेसन उडान हुने भन्दै आ–आफ्नो उडान तालिका परिमार्जन गर्न वायुसेवा कम्पनीहरूलाई बिहीबार नै सूचना जारी गरिएको थियो ।

त्रिभुवन अन्तर्राष्ट्रिय विमानस्थल कार्यालयका प्रवक्ता टेकनाथ सिटौलाले दिउँसो २ः३० बजेसम्म उडान र अवतरण प्रभावित हुने भएकाले बिहीबार नै सोहीअनुसार तालिका बनाउन सूचना जारी गरिएको बताए ।

उनका अनुसार अहिले विमानस्थलको क्यालिब्रेसन फ्लाइट भइरहेको छ । दिउँसो २ः३० बजेपछि उडान र अवतरण नियमित हुने उनले जानकारी दिए ।

कार्यालयका अनुसार शुक्रबार अन्तर्राष्ट्रियतर्फ २८ र आन्तरिकतर्फ १४७ उडान/अवतरण तालिका छ ।

नेपाल नागरिक उड्डयन प्राधिकरणले एरो थाइमार्फत क्यालिब्रेसन फ्लाइट गराएको हो । यो जहाज गौतमबुद्ध अन्तर्राष्ट्रिय विमानस्थलको क्यालिब्रेसन फ्लाइटका लागि नेपालमा ल्याइएको थियो ।

योसँगै अरू विभिन्न विमानस्थलको पनि क्यालिब्रेसन फ्लाइट गरिने प्राधिकरणले जनाएको छ ।

सोही जहाजले गौतमबुद्ध अन्तर्राष्ट्रिय विमानस्थलको क्यालिब्रेसन फ्लाइट सम्पन्न गरिसकेको छ ।