काठमाडौं । बलात्कारको आरोप लागेका नेकपा (एमाले)का नेता तथा मुगुका सांसद मोहन बानियाँ हाल प्रहरी नियन्त्रणमा छन् । गएको सोमबार बानियाँलाई नेपालगन्जस्थित राँझा एयरपोर्टबाट प्रहरी टोलीले पक्राउ गरेको थियो । पक्राउ पुर्जी जारी भएको दुई सातापछि उनी पक्राउ परेका हुन् । अनुसन्धान जारी छ ।

प्रहरीले सांसद बानियाँलाई ‘ठूला मान्छे आफैँ आउँछन्’ भन्दै भित्री अनुसन्धान जारी राखेको जनाएको थियो । ‘‘एमसीसी र सदनको काममा व्यस्त रहेको खबर आयो । यद्यपि, ठूला मान्छे आफैँ उपस्थित हुन्छन्,” केही दिनअघि जिल्ला प्रहरी कार्यालय बाँकेका डीएसपी मधुसूदन न्यौपानेले भनेका थिए ।

नेपालगन्जस्थित अप्सरा होटेलमा जबर्जस्ती करणी गरेको भन्दै जुम्लाकी एक शिक्षिकाले गएको माघ २७ गते बानियाँविरुद्ध उजुरी दिएकी थिइन् । त्यसपछि बानियाँले आफू निर्दोष रहेको र फसाउनका लागि षड्यन्त्र गरिएको भन्दै आफैँ प्रहरीमा उपस्थित हुने बताएका थिए ।

तर, पक्राउ पुर्जी जारी भएपछि उनी सम्पर्कविहीन बनेका थिए । पक्राउ पुर्जी जारी भएकै दिन सदन तथा सभामुखलाई जानकारी दिनुपर्ने प्रावधानानुसार प्रहरीले सदन तथा सभामुखलाई जानकारी गराएको थियो ।

पक्राउ पुर्जी जारी भएको करिब दुई सातापछि प्रहरीले बानियाँलाई सम्पर्क गर्‍यो । त्यति बेला पनि बानियाँले आफूलाई पक्राउ गर्न खोजिराख्नु नपर्ने र आफैँ उपस्थित हुने बताएका थिए ।

डीएसपी न्यौपाने सबै प्रक्रिया पुर्‍याएर मात्रै पक्राउ गरिएको बताउँछन् । ‘‘बानियाँविरुद्ध पक्राउ पुर्जी जारी भइसकेपछि प्रक्रिया पुर्‍याएर बुझ्न खोजेका थियौँ । सदन चलिरहेको बेलामा के कसरी अनुसन्धान गर्ने भन्नेबारे अनुसन्धान अगाडि बढाइएको थियो । पक्राउ परिसकेपछि सरकारी प्रावधानहरू पुर्‍याएर सार्वजनिक गर्‍यौँ,” उनले भने ।

यसअघि, पक्राउ पुर्जी जारी भएलगत्तै प्रहरीले उनलाई पत्राचार गरेको थियो । ‘‘हामीले आफ्नो तर्फबाट अनुसन्धान तीव्र पार्दै गयौँ । उहाँ आफैँ आउने पनि भन्दै आउनुभएको थियो । यस हिसाबले उहाँमाथि निगरानी राखिरहेका थियौँ । सोमबार पक्राउ गर्‍यौँ,” उनले भने ।

डीएसपी न्यौपानेले बानियाँविरुद्ध थप अनुसन्धानका लागि आजै म्याद थप हुन सक्ने बताए ।

ती महिलाले संयुक्त व्यावसायिक प्रयोजनका लागि बानियाँलाई दिएको २५ लाख रुपैयाँमध्ये २० लाखको बाउन्स चेक दिएर उनले बदमासी गरेको समेत बताएकी छन् । बानियाँले सुर्खेतमा पाँच लाख दिएर बाँकी २० लाख नेपालगन्जमा दिने आश्वासन दिएको शिक्षिकाले बताउँदै आएकी छन् । उक्त २० लाख लिन नेपालगन्ज बोलाएर उल्टै बिहानपख जबरजस्ती करणी गरेको आरोपसहित शिक्षिकाले जाहेरी दिएकी थिइन् । ती शिक्षिका नेकपा (माओवादी केन्द्र)की नेत्री रहेको जनाइएको छ ।

आजै बानियाँको पद निलम्बित हुन सक्ने 
बलात्कारको आरोप लागेका सांसद बानियाँविरुद्ध पक्राउ पुर्जी जारी भएपछि प्रहरीले सभामुख र सदनलाई जानकारी दिएको थियो । सोहीबमोजिम सभामुखले आज बस्ने प्रतिनिधिसभा बैठकबाट उनको पद निलम्बित भएको घोषणा गर्न सक्नेछन् ।

प्रतिनिधिसभा बैठकमा सभामुखले बानियाँ निलम्बित हुने पत्र पढेर सुनाए उनी निलम्बित हुने संघीय संसद् सचिवालयका प्रवक्ता रोजनाथ पाण्डेले जानकारी दिए । “प्रहरीले सभामुख र सदनलाई दिएको जानकारीका आधारमा आज सभामुखले पत्र पढेर सुनाए भने स्वतः निलम्बित हुनेछन्,” उनले भने ।