काठमाडौं । कञ्चनपुरको शुक्लाफाँटा राष्ट्रिय निकुञ्जमा बाघ सर्वेक्षण कार्य सुरु गरिएको छ । निकुञ्ज क्षेत्रमा भएको बाघको संख्या पत्ता लगाउनका लागि सर्वेक्षण कार्य सुरु गरिएको हो ।

राष्ट्रिय बाघ सर्वेक्षण–२०७८ अन्तर्गत शुक्लाफाँटा राष्ट्रिय निकुञ्जको शुक्लाफाँटा क्षेत्र, लालझाडी र जोगबुढा क्षेत्रमा बाघ सर्वेक्षण कार्यको थालनी गरिएको छ । निकुञ्ज कार्यालयका अनुसार उक्त क्षेत्रलाई बाघ सर्वेक्षणका लागि दुई किलोमिटर लम्बाइ तथा दुई किलोमिटर चौडाइ भएका २६० वडा ग्रीडहरूमा विभाजन गरिएको छ ।

निकुञ्जका प्रमुख संरक्षण अधिकृत किशोरकुमार मेहताले स्वचालित क्यामेराबाट सर्वेक्षण गर्न लागिएको बताए । तीन सातामा बाघ गणना सम्पन्न हुनेछ । बाघ सर्वेक्षणका लागि कुल ५२० थान क्यामेरा, ७० प्राविधिक र पाँच हात्ती परिचालन गरिने निकुञ्ज कार्यालयले जनाएको छ ।

शुक्लाफाँटामा सन् २००९ देखि बाघ गणना हुँदै आएको छ । सन् २०२२ सम्ममा बाघको संख्या दोब्बर पुर्‍याउने सरकारको लक्ष्यानुरूप शुक्लाफाँटामा समेत बाघको संख्या दोब्बर गर्ने लक्ष्य राखिएको छ ।

शनिबार उक्त कार्यक्रम शुभारम्भ गर्न कञ्चनपुर पुगेका वन तथा वातावरणमन्त्री रामसहायप्रसाद यादवले बाघ सर्वेक्षण कार्यक्रमले देशभर बाघको संख्या पत्ता लाग्ने बताए । जैविक विविधतामा पर्ने असरलगायत महत्त्वपूर्ण कुरा सर्वेक्षणबाट थाहा हुने उनले उल्लेख गरे ।

निकुञ्जमा यसअघि गरिएको सर्वेक्षणमा १६ बाघ भेटिएका थिए ।