काठमाडौं ।  नेपालको सबै भन्दा ठूलो सिमेन्ट उत्पादकमध्येको एक जगदम्बा सिमेन्ट नेपाल गुणस्तर अवार्डबाट सम्मानित भएको छ ।  जगदम्बा सिमेन्ट यसअघि सन् २०१४, २०१५ र २०१९ मा नेपाल गुणस्तर अवार्डबाट सम्मानित भइसकेको छ । यस्तै रूपन्देही उद्योग संघबाट पनि २०७३ र २०७५ मा उत्कृष्ट उद्योगबाट सम्मानित भइसकेको छ ।

कम्पनीले ४३ र ५३ ग्रेड ओ.पी.सी, पी.पी.सी. र पी.एस.सी. सिमेन्ट उत्पादन र वितरण गर्दै आइरहेको छ । सन्‌ २००१ मा स्थापना भएको यो कम्पनीले उच्च गुणस्तरको कच्चा पदार्थको प्रयोग, क्लोज सर्किट मिल, आधुनिक उपकरण र विश्वस्तरीय भीआरएम प्रविधिबाट गुणस्तरमा निरन्तर सुधार गर्दै गुणस्तरीय सिमेन्ट उत्पादन गर्दै देशको आवश्यकता पूरा गर्दै आइरहेको जनाएको छ ।

दुई दशकदेखि निर्माण जगतमा गुणस्तरिय सिमेन्ट उत्पादन तथा बिक्री वितरण गर्दै आएको जगदम्बा सिमेन्टले आफ्नो ओपीसी ब्रान्डमा नेपाल गुणस्तरबाट लागु गरिएको ४३ ग्रेड र ५३ ग्रेडको सिमेन्ट उत्पादन तथा बिक्री वितरण गर्न गुणस्तरका सम्पूर्ण मापदण्ड पूरा गरी नेपाल गुणस्तर तथा नाँप तौल विभागबाट एनएस व्राण्डमा ५७२ को प्रमाण पत्र प्राप्त गरिसकेको पनि जनाएको छ ।

साधारण पोर्टल्यान्ड सिमेन्ट (ओपीसी)लाई २८ दिनमा आउने भारवहान क्षमताको आधारमा वर्गिकरण गर्न सकिने भन्दै कुन ग्रेडको सिमेन्ट के मा प्रयोग हुन्छ भन्ने जनाएको छ ।

३३ ग्रेडको ओपीसी : २८ दिनमा न्यूनतम ३३ कम्प्रेसिभ क्षमता प्राप्त हुने ओपीसी सिमेन्ट हो । यो सामान्य खालका संरचनाहरूमा प्रयोग हुन्छ, जसको भार वाहन क्षमता अहिले बजारमा पाउने पीपीसी र पीएसी सिमेन्ट बराबर नै हुन्छ । नेपाल गुणस्तर अनुरूप अहिले बजारमा सिमेन्टको बोरामा ओपीसी मात्र लेखेको बोराहरू ३३ ग्रेड मान्यता पाएका सिमेन्टहरू छन्‌ ।

४३ ग्रेडको ओपीसी : २८ दिनमा न्यूततम ४३ कम्प्रोसिभ क्षमता प्राप्त हुने सिमेन्ट हो । यो विभिन्न सामान्य देखि विशेष खालका कंक्रिट संरचना निर्माणमा प्रयोग हुन्छ । यस्ता सिमेन्ट घर, अपार्टमेन्ट, जलविद्युत, पुल, बाटो हरेक प्रकारका निर्माणमा उपयोगी हुन्छ ।

यसको कम्प्रेसिभ क्षमता ३ दिनमा २३ एमपीए, ७ दिनमा ३३ एमपीए, र २८ दिनमा ४३ एमपीए न्यूनतम रूपमा हुनुपर्दछ । अहिले बजारमा नेपाल गुणस्तर अनुरूप ४३ ग्रेडका सिमेन्टको बोरामा ४३ ग्रेड ओपीसी भनेर लेखिएको हुन्छ ।

५३ ग्रेडको ओपीसी : २८ दिनमा न्यूनतम ५३ कम्प्रेसिभ क्षमता प्राप्त हुने सिमेन्ट हो । यो विशेष संरचना,जहाँ छोटो समयमा धेरै कम्प्रेसिस क्षमता चाहिने संरचनामा प्रयोग हुन्छ । जस्तै प्री स्ट्रेस्ड कंकिट, सिमैन्ट ग्राउटस, पुल, विद्युत गृह निर्माण,बहु तल्ला भवन, कंक्रिटमा ३५ एमपीए भन्दा बढी भारवाहन क्षमता चाहिने संरचनाहरू आदि । यसमा ३ दिनमा २७, ७ दिनमा ३७ र २८ दिनमा न्यूततम ५३ एमपीए क्षमता हुनुपर्दछ । अहिले नेपाली बजारमा नेपाल गुणस्तर अनुरूप ५३ ग्रेडको सिमेन्टको बोरामा ५३ ग्रेड ओपीसी भनेर लेखिएको हुन्छ ।

यसरी ३३, ४३ र ५३ ग्रेडका सिमेन्ट यसले २८ दिनमा कुनै पनि संरचनालाई थेग्न सक्ने शक्तिको आधारमा वर्गीकरण गरिएका छन्‌ । जति धेरै बढी ग्रेडको सिमेन्ट भयो त्यति नै छोटो समयमा धेरै क्षमताको शक्ति तथा सिर्जना हुन्छ । बढी ग्रेडका सिमेन्ट प्रयोग गर्दा बढी ताप उत्पन्न हुनाले कंकिटिङसँगै क्युरिङ (पानीले भिजाउने) कार्यलाई पनि विशेष ध्यानदिनु पर्ने कम्पनीले जनाएको छ । सिमेन्टको ग्रेड अनुरूप बजार मूल्य पनि फरक हुन्छ ।