मस्को । युक्रेनको विषयमा अमेरिका र रुसबीच युद्धको आवाज चर्किरहेका बेला विश्व राजनीतिको तेस्रो प्रमुख खेलाडी चीनले पनि मुख खोलेको छ ।

पछिल्ला केही दिनदेखि चीनले मस्को र वासिङटन दुवैलाई शान्त रहन र शितकाल युद्धको मानसिकता त्याग्न आह्वान गर्न थालेको छ । साथै चीनले स्पष्ट रूपमा आफूले रुसको चिन्तालाई समर्थन गर्ने जनाएको छ । यसरी चीनले आफ्नो लामो समयदेखिको गठबन्धन तथा पूर्व कम्युनिस्ट 'कमरेड' रुसलाई सघाउने जनाएको हो । 

गत साता चीनका विदेशमन्त्री वाङ यीले रुसको सुरक्षा चासोहरू वैधानिक भएको र तिनलाई गम्भीर ढंगले सम्बोधन गरिनुपर्ने बताएका थिए । 

सोमबार संयुक्त राष्ट्र संघका लागि चिनियाँ दूत झाङ जुनले अझै एक कदम अघि बढेर रुसले अन्तर्राष्ट्रिय शान्तिलाई खतरा पुर्‍याइरहेको भन्ने अमेरिकी दाबीलाई चीनले अस्वीकार गर्ने जनाएका थिए । 

त्यसैगरी झाङले अमेरिकाले संयुक्त राष्ट्र संघको सुरक्षा परिषद्को बैठक बोलाइनुलाई 'एकहोरो खालको कुटनीति'को संज्ञा दिँदै त्यो वार्ताका लागि उपयुक्त नभएको भनेर आलोचना गरेका थिए ।

तर चीनको सरकारी सञ्चार माध्यमले युक्रेनको समस्यालाई हल्का रूपले लिइरहेको छ ।

चीनमा पश्चिम जगत विरोधी भावना फैलिरहेको छ भने युक्रेनको समस्यालाई पश्चिमी जगतको अर्को असफलताको रूपमा परिभाषित गरिँदैछ । 

चिनिया जनताका दृष्टिकोणमा अमेरिकी नेतृत्वमा रहेको नाटोले अन्य मुलुकहरूको सार्वभौमलाई सम्मान गर्न अस्वीकार गर्दै मनपरी काम गरिरहेको छ । उदाहरणका लागि नेटोले रुस र चीनको आफ्नो भुमि प्रतिरक्षा गर्ने अधिकारीलाई बेवास्ता गरेको बताइएको छ । 

चीनको द ग्लोबल टाइम्सले चीन र रुसबीच सदैव निकट र समुधुर सम्बन्धले विश्वको स्थिरताको प्रतिरक्षा गर्ने अन्तिम विकल्प रहेको जनाएको छ ।

यसैगरी चीनको सरकारी समाचार एजेन्सी सिन्ह्वाले अमेरिकाले आफ्नो घरेलु चासो पन्छाउने र युरोप माथिको आफ्नो प्रभाव ब्युँताउने प्रयास गरिरहेको जनाएको छ ।

यता ब्रुकिङस प्रतिष्ठानका नीति निर्देशक जेस्सिका ब्रान्ड्टले चीनको आलाचना गर्दै अमेरिका र नेटोका पक्षमा ट्विटरमार्फत दिएको अभिव्यक्तिलाई चीनमा प्रतिवन्ध लगाइएको छ ।

केही अन्तर्राष्ट्रिय राजनीतिक विश्लेषकहरूले अहिले चीन र रुसबीचको सम्बन्ध माओ र स्टालिनका पालामा भन्दा बढी मजबुत रहेको प्रतिक्रिया दिएका छन् ।

बीबीसीबाट ।