काठमाडौं । विमल घर्तीमगरको उत्कृष्ट पुनरागमनमा नेपालले शनिबार मोरिससविरुद्धको मैत्रीपूर्ण फुटबल खेलमा १–० को विजय हासिल गरेको छ ।
त्रिपुरेश्वरस्थित दशरथ रंगशालामा नेपालले ५५औँ मिनेटमा विमलको गोलबाट अग्रता लिएको थियो । अञ्जन विष्टले विपक्षी खेलाडीबाट खोसेर दिएको लामो पासलाई विमलले ‘फर्स्ट टच’मै पोस्टको दिशा दिएका थिए । विमलले दोस्रो बार च्यापेर हानेको बल बारमा लागेर छिरेको थियो ।
विमलले पछिल्लोपटक राष्ट्रिय टोलीबाट खेलेको जोर्डनविरुद्ध हो । ०७६ असोजमा विश्वकप छनोटमा जोर्डनविरुद्ध खेलेपछि विमल राष्ट्रिय टोली बाहिर थिए ।
फिफा विश्वकप छनोटअन्तर्गत नै कुवेतविरुद्धको खेलमा पनि विमललाई बोलाइएको थियो । तर, खेल्न भुटान जानु अघिल्लो राति डिस्को गएको भन्दै एन्फा अनुशासन समितिले विमलसहित चार खेलाडीलाई कारबाही गरेको थियो । जसका कारण विमलले भुटान यात्रा गुमाएका थिए ।
गत वर्ष पुस पहिलो साता प्रशिक्षणका दौरान विमलको घुँडामा चोट लागेको थियो । उनको घुँडाको एन्टेरियर क्रुसिएट लिगामेन्ट (एसीएल) च्यातिएको थियो भने मेडिएल कोल्याटरल लिगामेन्ट (एमसीएल)मा पनि हल्का चोट लागेको थियो । कतारस्थित अस्पेटर अस्पतालमा विमलको शल्यक्रिया भएको थियो ।
शल्यक्रियापछि चोटमुक्त भएर फर्किएका विमलले यही लिगमार्फत मैदानमा पुनरागमन गरेका हुन् । मच्छिन्द्र फुटबल क्लबबाट खेलेका विमलले जारी लिगमा तीन गोल गरिसकेका छन् । विग्रेड ब्वाइज क्लबविरुद्धको खेलमा उनी उत्कृष्ट लयमा पनि देखिएका थिए । त्यही प्रदर्शनलाई हेरेर मुख्य प्रशिक्षक अब्दुल्लाह अल्मुताइरीले विमललाई राष्ट्रिय टोलीमा बोलाएका थिए । त्यसमा पनि विमल खरो उत्रिए ।
७६औँ मिनेटमा अञ्जन विष्ट अभागी रहे । जगजित श्रेष्ठको कर्नरमा अञ्जनले हानेको हेडिङ क्रसबारमा लागेर फर्किएको थियो । अञ्जनले पेनाल्टी क्षेत्रबाट हानेको अर्को प्रहार पनि क्रसबारमा लागेर फर्किएको थियो । जगजितले पनि सन् २०१५ पछि पहिलोपटक राष्ट्रिय टोलीबाट खेलेका हुन् ।
पहिलोमा हाफमा पनि विमलले एउटा राम्रो मौकामा बल विपक्षी गोलकिपर केभिन जेन लुइसको हातमा थमाएका थिए । पहिलो हाफमै सुमन लामाले पेनाल्टी क्षेत्र बाहिरबाट हानेको दुई प्रहारले पोस्टको दिशा लिन सकेन ।
पहिलो हाफ सकिन १० मिनेट बाँकी हुँदा मोरिससले एक राम्रो ‘मुभ’ बनाएको थियो । तर, एड्रिइन फ्रोन्कोइसको प्रहारलाई नेपालका गोलकिपर किरण चेमजोङले बचाएका थिए ।
