काठमाडौं । नेपाल प्रिमियर लिग (एनपीएल)को फ्रेन्चाइज टोली विराटनगर किंग्सले अभिनेता दयाहाङ राईलाई सद्‌भावना दूत बनाएको छ । विराटनगरले आइतबार एक कार्यक्रमकाबीच दयाहाङलाई ‘गुडविल एम्बेसडरका रूपमा सार्वजनिक गरेको हो ।

सम्झौता पत्रमा विराटनगरका मालिक बैंकटेस मुन्द्रा र दयाहाङले हस्ताक्षर गरेका थिए । सम्झौता एक वर्षका लागि हुने छ । सम्झौता रकम भने खुलाइएको छैन ।

कार्यक्रममा नेपाल क्रिकेट संघ (क्यान)का सचिव पारस खड्का, प्रवक्ता छुम्बी लामालगाताय उपस्थित थिए ।

विराटनगरको मार्की खेलाडीमा सन्दीप लामिछाने छन् । यसैगरी, ड्रिम्स स्पोर्टस प्रालिको स्वामित्वमा रहेको टोलीले आयरल्यान्डका केविन ओ’ ब्रायनलाई मुख्य प्रशिक्षकमा नियुक्त गरेको छ ।

नेपाल क्रिकेट संघ (क्यान)को आयोजनामा एनपीएल मंसिर १५ देखि पुस ६ गतेसम्म हुँदै छ ।

प्रतियोगितामा आठ फ्रेन्चाइज टोलीको सहभागिता रहने छ । लिगमा विराटनगरसँगै, पोखरा एभेन्जर्स, जनकपुर बोल्ट्स, काठमाडौं गुर्खाज, चितवन राइनोज, सुदूरपश्चिम रोयल्स, कर्णाली याक्स र लुम्बिनी लयान्सले प्रतिस्पर्धा गर्ने छन् ।