मंगलबारे । आज बिहान इलाममा पिकअप जीप दुर्घटना हुँदा दुईजनाको मृत्यु भएको छ । झापाबाट इलाम आउँदै गरेको प्रदेश १–०१–००१ च ७९१६ नम्बरको पिकअप आफैँ अनियन्त्रित भई सडकदेखि करिब ५००  मिटर तल खसेको छ ।

मेची राजमार्गको रोङ गाउँपालिका–४, पहिरोमा पिकअप दुर्घटना भएको जिल्ला प्रहरी कार्यालयका सूचना अधिकारी गंगाबहादुर थापाले जानकारी दिए । उनका अनुसार दुर्घटनामा परी झापाको मेचीनगर नगरपालिका–४ बस्ने ५५ वर्षीय रमेश थापा र सोही स्थान बस्ने ४० वर्षीय सूर्यबहादुर थापाको घटनास्थलमा नै मृत्यु भएको हो ।

जीप चालक मेचीनगर–४ बस्ने ३३ वर्षीय अर्जुन कोइराला समेत गम्भीर घाइते भएको बताइएको छ । उनलाई उपचारका लागि झापाको बीएन्डसी अस्पताल लगिएको छ । घटनाका विषयमा थप अनुसन्धान भइरहेको प्रहरीले जनाएको छ । रासस