भादगाउँ । भक्तपुरमा कोरोना संक्रमितको ‘ग्राफ’ उकालो लागेको छ । पछिल्लो सयम जिल्लामा दैनिक ५०० भन्दा धेरै संक्रमित थपिएका छन् ।

स्वास्थ्य कार्यालयका अनुसार जिल्लामा आइतबार २५८ पुरुष र २७२ महिला गरी ५३० जना नयाँ संक्रमित थपिए । त्यस्तै, यही माघ ८ गते शनिबार ९६८, ७ गते ६२७, ६ गते ५६४ संक्रमित थपिएको स्वास्थ्य कार्यालयका प्रमुख कृष्णबहादुर मिजारले जानकारी दिए ।

संक्रमितको संख्या बढेसँगै जिल्लामा सक्रिय संक्रमितको संख्या समेत ह्वात्तै बढेको छ । जिल्लामा आइतबारसम्म सक्रिय संक्रमितको संख्या चार हजारनजिक पुगेको छ । कुल सक्रिय संक्रमितको संख्या तीन हजार ९९८ पुगेको हो । तीमध्ये पुरुष दुई हजार ७० र महिला एक हजार ९२८ छन् ।

जिल्लामा चार नगरपालिकामध्ये सबैभन्दा धेरै मध्यपुरथिमिमा एक हजार १४७ सक्रिय संक्रमित छन् । तीमध्ये ५८९ पुरुष र ५५८ महिला छन् । मध्यपुरथिमिमा आइतबार मात्रै २०२ संक्रमित थपिएका थिए ।

त्यस्तै, सूर्यविनायकमा एक हजार ६२, भक्तपुरमा ७६५ र चाँगुनारायण नगरपालिकामा ४६१ र अन्य २७४ सक्रिय संक्रमित रहेको स्वास्थ्य कार्यालयले जनाएको छ ।

सक्रिय संक्रमितमध्ये ३१ संस्थागत आइसोलेसन तथा अस्पतालमा र २३ जना सामान्य आइसोलेसनमा उपचाररत छन् । त्यस्तै, एचडीयूमा चार, आईसीयूमा तीन र भेन्टिलेटरमा एकजनाको उपचार भइरहेको छ । जिल्लाका विभिन्न अस्पतालमा सामान्य आइसोलेसन २५६ शय्या, एचडीयू ११७ शय्या, आईसीयू ३५ र भेन्टिलेटर १६ छन् ।

यसैगरी, जिल्लमा कोरोना संक्रमणका कारण मृत्यु हुनेको संख्या ३६० पुगेको छ । यही माघ ८ गते एक संक्रमितको मृत्युसँगै जिल्लामा कोरोना संक्रमणका कारण मृत्यु हुनेको संख्या ३६० पुगेको हो । रासस