काठमाडौं । राष्ट्रिय प्रजातन्त्र पार्टी (राप्रपा)को आज पदाधिकारी बैठक बस्दै छ । धुम्बाराहीस्थित केन्द्रीय कार्यालयमा बस्न लागेको बैठकमा निर्वाचन आयोगको पत्रका विषयमा छलफल हुने बताइएको छ ।

“निर्वाचन आयोगले राप्रपाको विधानबाट हिन्दुराज्य र संवैधानिक राजसंस्थासहितको प्रजातन्त्र हटाउन निर्देशन दिँदै पत्र काटेको छ,” राप्रपा महामन्त्री कुन्ती शाहिले भनिन्, “राप्रपाको झन्डाबाट गाई समेत हटाउन निर्देशन दिँदै पत्र पठाएको छ । त्यो पत्रको जवाफ दिने विषयमा छलफलका लागि हामी बैठक बस्दै छौ ।”

शाहीले विगतदेखि चुनाव लड्दै आएको चिह्न र विधान सच्याउन निर्देशन दिनु प्रजातान्त्रिक मान्यता र संविधानविपरीत रहेको दाबी गरिन् ।

निर्वाचन आयोगले यही माघ २ गते राप्रपालाई पत्र पठाएर संवैधानिक राजतन्त्रसहितको प्रजातान्त्र र सनातन हिन्दुराज्य विधानबाट हटाउन निर्देशन दिएको थियो । यस्तै, आयोगले राप्रपाको झन्डामा रहेको गाई चिह्न पनि हटाउन भनेको थियो ।

‘नेपालको राष्ट्रिय झन्डा, निसान छाप, राष्ट्रिय फूल लालीगुराँस, राष्ट्रिय रङ सिम्रिक, राष्ट्रिय जनावर गाईलगायत राष्ट्रिय पहिचान बोकेका व्यक्तित्वका तस्बिर वा चिह्न दललाई प्रदान नगर्ने र कुनैलाई दिइएको भए पुनरवलोकन गर्ने निर्णय भएकाले झन्डाको मध्यभागमा गाई चिह्न भन्ने वाक्यांश हटाउन’ पत्रमार्फत आयोगले निर्देशन दिएको छ ।