काठमाडौं । एट्लेटिको मड्रिड बुधबार राति रियाल सोसिडाडसँग २–० ले पराजित भएपछि कोपा डेल रेको अन्तिम–१६ बाटै बाहिरिएको छ । 

रियाल सोसिडाडले एडनान जानुजाजको गोलबाट ३३औं मिनेटमा अग्रता लिएको थियो । ४७औं मिनेटमा एलेक्जेन्डर सोर्लोथले रियालको अग्रता दोब्बर बनाए ।

खेल अघि रियाल सोसिडाडका समर्थकले एट्लेटिको मड्रिडका खेलाडी चढेको बसमा आक्रमण गरेका थिए । बसमा सामान्य क्षति भएको स्पेनिस सञ्चारमाध्यमले जनाएका छन् । पुलिसले हस्तक्षेप नगर्दासम्म सोसिडाडका समर्थकहरुले एट्लेटिकाका खेलाडीविरुद्ध नाराबाजी गरेका थिए । 

त्यसअघि कोपा डेल रेमै रियाल बेटिसका समर्थकले मैदानमा सेभियाका खेलाडीलाई पीभीसीको टुक्राले प्रहार गरेपछि स्पेन फुटबल संघले रियाल बेटिसको मैदानमा दुई खेल प्रतिबन्ध लगाइदिएको थियो । सेभियाका खेलाडी जोन जोर्डनलाई अस्पतान नै लग्नु परेको थियो । समर्थकको आक्रमण कारण खेल नै स्थगित गरिएको थियो । र, भोलिपल्ट विना दर्शक खेल खेलाइएको थियो ।